Un felis djasabra...

Tremendo e idea di e eksposishon di Reinan di Tumba na Sambil ta...

Te asta mi mes ku a kana wak loke ku a keda presentá a rekordá algun momentu ora ku mi a mira e historia ku tambe a keda kompartí ‘mei mei’ den área di eksposishon....

Te asta e Eks Reinan di Tumba ku tabata tei ayera a emoshoná ora ku nan mira ku defakto nan ta un parti dje historia kultural di Kòrsou...

E área di eksposishon di Boy Dap ta apart den e loke ta konosí komo e ‘Booth’ di TeleCuraçao na altura dje entrada prinsipal di Sambil...

Tin un mantel di Boy Dap ku ta data for di 1974, algu históriko ku e kantante i famia a sa di kuida durante di tur e añanan aki...

Luwi Jano ku tabat’ei ayera nochi a pidi durante di un deklarashon na prensa pa e otro Reinan di Tumba pa kontribuí pa mas trofeo i otro rekuerdonan keda tres’é pa forma parti dje eksposishon...

Luwi a keda impreshoná pa loke tin presentá...

Tico Balentien tambe a indiká di ta hopi kontentu i ta sigur ku e tin su fanátikonan ku tambe tin rekuerdo di su tres biahanan ku el a gana e festival...

El a pidi pa kompartí esakinan durante di e eksposishon...

E eksposishon ta un inisiativa di sra. Maja Atalita Vervuurt, kende a indiká ku porfin su soño ku e tabatin pa mas ku 10 aña a bira un realidat...

Trabounan den Festival Center ta tumando lugá ketu bai i segun Feco e públiko lo eksperensia un Festival Center ku lo ofresé e públiko tur loke nan ke pa por disfrutá dje festival...

Bandanan ta ensayando i ayera nochi ma komprondé ku tin un banda ku su sekshon di brass no a yega ainda i ta te djadumingu nan ta bai yega Kòrsou...

Ke men ta kestion di baha for di avion i bai ensayo mesora...

Tin 11 dama partisipando den Festival di Tumba loke segun mi ta un kantidat basta haltu...

Parse ku Yves Cooper tin su partisipashon na serio, kompader a pasa su tumba i ta rékete kontentu ku loke el a tende...

Nan di ku e tumba tin su kos aden...

Ayera nochi ma tuma nota ku ta danki na e organisashonnan sosial ku ta den Parada di Tiner ku nos por a tene e elekshon di ayera...

Meta di Parada di Tiner tabata ku skolnan lo a partisipá na e marcha, pero awor ta resultá ku skolnan a kuminsá kita pia for dje evento...

E diferente atrakshonnan den Parada ku e gruponan sosial ta ofresé ta kita tur alumnonan for di e skolnan...

Loke ta debilitá e skolnan formalmente....

Públiko amante di Festival di Tumba den e dianan aki ta trahando riba nan kombinashon pa bisti durante dje kuater dianan dje Festival...

Ayera nos a risibí e promé kupon ku ta partisipá den kampaña di Rei ken ta sali Rei òf Reina di Tumba...

Uniko konklushon ku nos por saka ta ku esun ku a yena e formulario aki ta kere siegamente den su faborito...

Awor ta kon el a yega na e promé finalista si mi no sa, e shon a usa un nòmber di un kantante popular ku no ta partisipando na e festival...

Ayera nochi un biaha mas Glenn Thomas i su ‘Rumba pa Tumba’ a skor haltu, Glenn a toka tumba te 1 or di mardugá...

Awe djasabra e kos tei sinta mèrdia na MAS 99 na momentu ku nan presentá 5 ora di tumbanan ku a ‘He’, pero no a logra...

Tin diferente tumba ku no a gana e korona pero ku den kaya a bira popular i te ku awe ta zona ketu bai...

Awe nochi nos lo sa ken ta nos Reina, Prens i Pancho di Karnaval 2020...

E sertámen ta tuma lugá den WTC i ta spera un bon públiko awe nochi...

Pa mañan djadumingu lo tin e elekshon hubenil i pa esaki Fundashon JAG a sòru pa tur mucha bou di 12 aña por drenta grátis...

Disfrutá di bo wikènt i nos ta topa djaluna den otro edishon ‘Louie Louie’ den Karnaval 2020...