Un felis djárason na tur nos lektornan...

Awe ta fecha ku MCB su tim di sòftbòl lo duna tur informashon relashoná ku nan ‘Jump In’...

Nan tei subi seru ku nan evento i pa awe tardi tur detaye lo ta konosí...

Pe aña aki e kalènder di aktividatnan di Karnaval a duna chèns pa dos jump in por a skohe kada un, un fecha pa dje forma ei evitá ku nan ta riba mesun fecha...

Ta trata di e jump in di MCB su tim di sòftbòl i esun di Viva/ SVB...

Nos a tuma nota ku e pleitu, malkontentu ku tin entre dos banda a ekspandé su mes i drenta temporada di Karnaval ...

Ta resultá ku kosnan a bai dje ei ku bo no por kontratá nan 2 pa mesun jump in...

Kosnan a bai dje leu ei ku un kompositor ku a logra éksito grandi ku un kantante aña pasá lo no komponé e aña aki pe kantante, pasó tin diferensia di opinion entre e bandanan...

Ta di lamentá ku kosnan mester a yega dje leu...

Awor e kantante ta pendiente di dos otro kompositor pa e por risibí un tumba pa e bai Festival di Tumba kuné...

Ma komprondé tambe ku e “Koro di Oro” lo a keda kontratá pa presentá ‘eksklusivamente’ pa 1 banda so...

Festival di Tumba 2020 tin hopi kompetensia den dje...

Tin un banda ku ta bayendo ‘all out’ ku su partisipashon na Festival di Tumba...

Ta stail di “ It’s now or never” ...

Tin un kantante ku a keda desepshoná pa e motibu ku e amistat ku e tin ku un kompositor praktikamente ta keda kibrá òf wantá pa motibu di kompetensia entre bandanan...

Djaya banda ma komprondé ku tin un popular músiko ku no ke duna kara pa desishonnan ku el a tuma pa loke ta trata temporada di Karnaval...

E músiko aki segun nos a komprondé no por enfrentá e bèrdat i ta skonde pa kontestá telefòn te asta di su ‘mihó amigunan’...

Ma komprondé ku tin un banda ku ta dje interesá ei pa su sekshon di perkushon ta bon harma ku el a manda buska dos perkushonista for di Ulanda pa bin reforsá su banda...

Mi amigu ‘kòki’ ta na kaminda pa Kòrsou pa bin toka timbal i kampana pa un banda...

Ta awó e kabayero ta eksperensia su promé wenter ku ya kaba nan ke paga pasashi pe bin Kòrsou...

Trompetista i Trombonistanan a pone preis pone lidernan di banda sali na kareda...

Un konosido trompetista lokal lo mester ta esun ku a lanta un ‘asosashon’ di supladónan i bin ku un preis astronómiko...

Awó tin algun supladó ku ya kaba a disidí di bai e preis di kustumber pa nan no keda sin wòrdu kontratá...

Supladónan ta pidi areglistanan pordon pa loke ku nan por a hasi malu...

Nan ta konsiderá e areglonan pa Festival di Tumba komo un ‘straf’ pisá, no ta sobra lugá mes pa nan hala rosea, areglonan ta karga ku liña di brass...

Nan reklamo ta basa riba e echo ku brass ta keda yena henter e tumba i kasi te asta ora e kantante ta basha pregon nan tin ku flùit den esaki...

Ma komprondé ku resientemente tabatin un reunion entre dos organisashon liga ku Karnaval ku tur hende sa ku nan no ta riba bon pia ku otro...

E reunion parse tabata pa wak kon ta hasi solushoná e problema entre nan dos, awó ta resultá ku ta un instansia di Gobièrnu ta esun ku lo mester ta ‘watchdog’ entre e organisashonnan ...

Den e reunion ámbos dirigente lo mester a bisa ku nan no tin niun problema ku otro, pero ora bo sinta wak e situashon di aserka bo sa ku no ta awó, pero pa basta tempu kaba nan tin un ‘kes kes’ ku otro...

Tanten ku nos tin envidia riba otro pa oportunidatnan ku ta presentá nos lo keda konfrontá ku tipo di situashonnan asin’aki...

Karnaval ta un evento turístiko importante pa Kòrsou...

Mester sigui traha riba su desaroyo pa dje forma ei Ofisina di Turismo por sigui promové i pa nos por tin resultadonan positivo manera ántes na momentu ku hotèlnan ta yena di hendenan ku ta bin pa wak Karnaval...

Mester tin un plan pa di un forma organisá traha riba e promoshon internashonal di nos Karnaval...

Nos ta pendiente pa wak ki desishon lo tuma riba e presentashon di artistanan internashonal den Karnaval...

Tin un artista ku a keda anunsiá, pero te ainda segun mi no tin sigur ku e lo risibí e pèrmit pa presentá...

Ayera nochi lat un amigu ‘pompadó’ a bèl bisa ku e aña aki bo mester hasi orashon serka La Birgen pa despues dal un beter i gosa di e jump in...

Te mañan ku Dios ke! Nos ta topa aweró riba seru!...