Nos a yega wikènt i nos ta kla pa kue kabes pabou djadumingu awor pa nos bai disfrutá dje apertura di temporada di Karnaval di Bándabou...

E organisashon a move for di Playa Kenepa pa Parke Himno i Bandera, esaki despues di evaluashon ku Polis...

E organisashon a risibí bon reakshon, pero e gastunan ku ta bin aserka pa loke ta trata e parti di seguridat i tur otro detaye ku mester kumpli kuné na Playa Kenepa ta pone ku e evento ta bira demasiado karu pa e ta grátis...

E konklushon ei ‘Louie Louie’ ta yega na dje...

ICONS a saka nan komunikado pa aklará e situashon di nan banda...

Di otro banda Gentz ta ‘plaats rust, rust’ i mané mi ta mirando ta sigui traha ...

Ma tuma nota ku ayera 2 jump in mas a keda anunsiá i for di ora ku nan a keda anunsiá riba retnan sosial ta komentario tin...

Loke no ta bon ta e situashon di fanátikonan ‘del alma’ di ámbos banda ku ta kuminsá bira un tiki personal den henter e situashon ku tin entre e bandanan...

Tur hende mester laga e situashon pa nan mes resolvé esaki...

Ora ku e wòrdu resolvé, nos tur lo ta den nos gloria, pasó tin fiesta pa bai pa wak ken ta zona mas mihó i ken ta pone mihó ambiente...

Ayera ma tuma nota tambe di un wega di ‘shak’ ku ta wòrdu hungá i ora ma sinta studia e wega ma yega na e konklushon ku tin hende ku tin kurashi plùs...

Mi ta gosa nan si, pasó den tur e turbulensia, nan si ta dal stap bai dilanti...

AMAK a posponé nan rueda di prensa di ayera tardi pa motibu di áwaseru, e intenshon ta pa awe nan sigui esaki...

Mi ta rekomendá nan pa poné bou di dak den kurá di Licores ya sea ku áwaseru òf sin áwaseru esaki ta sigui...

Otro ko’i hari aki...

Den tur e asuntu dje dos bandanan tin algun ‘fake account’ ku a wòrdu habrí riba facebook i e hendenan ta buskando pa bira friends ku e fanátikonan dje otro banda pa nan por vosiferá nan apoyo total na e banda kontrali...

Di mes e ‘display pic’ ta kualke kos ménos e kara dje persona konserní...

Ma mira un ayera nochi i pa kolmo esaki tin e ‘post’ dje banda kontrali komo un di su picnan anto e pic of flyer di su banda mes e no tin, pero ta karga ku ‘puña’ pa e otro banda...

Konsentrá riba bo kos, hasié bon i legumai sobrá...

Aworakí segun mi ta otro bandanan ta probechando dje situashon ku a surgi aki...

Tur e kantantenan ‘freelance’ tambe ta hañando un ‘piet’ pa nan por presentá na diferente aktividat pa hasi e ambiente ‘hot’...

Tin gruponan di Karnaval ku ainda ta buskando miembro i bo ta mira esaki ku nan ta promoviendo nan grupo ketu bai ku presentashon di trahenan riba retnan sosial...

Otronan tin stress pasó nan a risibí dje tantu miembro ku awor ta kibrando kabes ku e tela ku mester yega awor pa por kose tur e trahenan...

Tin un grupo ku te asta su ‘handpiece’ ta manera kos ku no tin mas tela i produkto pa por kaba di produsí esakinan...

Gana Festival di Tumba 2020, e di 50 edishon lo ta un honor total...

Bo ta sinti ku e kompetensia ta hopi fuerte i ku esnan ku e último añanan aki ta klasifikando den Tòp 10 ta hopi serio ku nan tumba pa e aña aki...

Niun hende no ke bai ku un tumba ‘lali lali’, ta kompetensia na serio tin!...

Un saludo pa e hendenan di AGKK, te ainda nan ta ketu, no tin niun informashon ainda di e kantidat di gruponan ku a inskribí ...

Den pasado for di aworakí bo tin un bista kaba di e kantidat di gruponan i te asta e lista di informashon ta keda kompartí ku medionan di komunikashon...

Fo’i ayera supladónan for di Venezuela a kuminsá yega pa dje forma ei ensayonan por kuminsá tuma lugá...

Sigur pa Festival di Tumba Hubenil esaki ta masha importante pasó ta otro siman e festival ta tuma lugá...

Tumba ta sigui zona na radionan...

Ayera nochi trempan na Radio Direct nan tabata pendiente pa kuminsá zona e tumbanan for di 1971 bin ariba, nos tabata pendiente pa por a sigui e programa, pero despues mester a bira hasi algu otro i nos a lubidá pa bai skucha e programa, mas lat nos a kuminsá skucha ya ora ku e programa di farándula a kuminsá...

Medionan di komunikashon ta duna un aporte impagabel na Festival di Tumba...

Henter e promoshon i transmishon di entre otro Inskripshon di Festival di Tumba ta pèrkurá pa mas hende tin atenshon pa e festival i esaki ta reflehá su mes den benta di ‘Pay per View’ tantu riba TDS komo riba Cariflix...

Anto esaki sin konta e públiko ku ta asistí na e festival...

Pa mañan nos tin detaye dje rueda di prensa di AMAK...

Te mañan ku Dios ke!...