Un bon siman pa tur nos lektornan...

Kon a bai ke fin di siman...

Ensayonan pa Festival di Tumba a start pa algun banda, ounke tin otronan ku no a start ainda...

Ainda tin algun kompositor ku no a kaba ku nan komposishon pa esaki bai areglista...

Otronan tin nan piesa kla kaba i mester haña e pista serka areglista pa nan ta kla pa bai ensayo...

Djasabra mainta mi tabata buskando un konosido kompositor i kantante, ma yama masha hopi biaha mes, ora porfin ma logra drenta den kontakto kuné e promé kos ku el a bisa mi, Luis mi no ta kue telefòn paso tur hende ta yama pa haña yudansa ku letra di nan tumba i mi mester konsentrá riba loke ami ta trahando ...

Dibo D a konfirmá pa nos ku e no ta partisipá e aña aki na Festival di Tumba, trabounan durante henter 2019 a pone ku e no a haña chèns pa sinta i komponé un piesa pa defendé su korona....

Den mesun rosea el a bisa ku ta 10 aña kontinuo di partisipashon i ta bon pa Ser’e Bunita...

Dibo ta yòn ainda i ta di lamentá ku el a tuma e desishon di bandoná su partisipashon na e Festival...

Djasabra ICONS i Gentz a bai mesa den presensia di presidente di AMAK ku a intervení den e problema entre e dos bandanan...

Na final dje reunion a kumbiní ku lo tin un ‘media stilte’, pues niun di dos organisashon lo no bai prensa ku e situashon ku tin entre nan dos...

Aworakí ta despues di Festival di Tumba lo tin komentario atrobe...

Ambos lider/ doño di banda tabata na mesa...

Di loke nos por a komprondé un kombersashon kaminda tur dos banda a haña chèns pa ekspresá nan mes...

Ayera tabatin e apertura di temporada di Karnaval di Bándabou...

Bon ambiente i nos ta pendiente awor pa e siguiente aktividat di Karnaval di Bándabou ku lo ta e ‘Parada di Skol’ ku lo tuma lugá riba e djabièrnè mainta 21 di febrüari 2020...

Pe aña aki Bándabou ta wanta su mes na tres aktividat...

E promé finalista di Reina di Karnaval lo keda koroná komo Reina di Karnaval di Bándabou, esei ma komprondé for di Fundashon JAG...

E siman aki e atenshon lo ta riba e 12 partisipantenan pa Festival di Tumba hubenil ku ta tuma lugá djasabra awó den Festival Center...

E optimismo dje organisashon enkargá ku e Festival ta haltu...

Rich Pieter ta hopi konfia ku su 12 kantantenan lo duna un tremendo presentashon ku Dolce i Excellence Band...

Pa djadumingu e inskripshon di Festival di Tumba lo ta un ku lo trese bastante espektativa...

Nos ta kere ku lo tin e tradishonal 60 tumbanan ku lo inskribí pa partisipá...

Nos no a haña e impreshon ku lo tin mas partisipante, esaki debí ku no tin sufisiente músiko pa forma banda pa bai Tumba...

Tin basta un par di aña kaba ku no tin ‘Banda Fantasma’...

Ayera Radio Mas a dediká fo’i mèrdia te praktikamente 8 or di anochi ora ku nos a stòp di skucha pa por a kuminsá laborá na EXTRA na Festival di Tumba...

Patrick Martijn huntu ku Junior Alves, Gibi Doran i JJ a kompartí algun anektoda i historia di Karnaval, sigui mas despues pa Pachi Damon i tambe Ramiro Isebia kendenan tambe a toka tumba i kompartí nan saber ku oyentenan...

Bo ta skucha tipo di transmishonnan asin’aki ku smak i ora ta pasa bai sin bo mes paga tinu na esaki...

Grupo di Karnaval Bliss i Cache a uni manera nos a indiká siman pasá, awe nos ta kompartí ku e lektornan algun informashon dje ‘Circus’ ku nan ta bai presentá pa Gran Marcha...

Ma komprondé ku e plan dje 2 gruponan lo ta un grandi pa presentá algu úniko pa selebrashon di 50 aniversario di Karnaval di Kòrsou ...

AMAK a produsí un jingle pa 50 edishon di Festival di Tumba...

Gregory Colina a komponé, areglá i produsí, miéntras ku Ike i Amos a kanta...

E buki di informashon di Festival di Tumba dje aña aki tin bastante informashon interesante den dje...

Den e dianan ku ta bai sigui promé ku Festival di Tumba lo nos kompartí algun dje informashon aki ku nos lektornan...

Karnaval 50 EXTRA ta pa su kuenta...

Esei lo bira konosí e siman aki na momentu ku anunsiá e transmishon di Inskripshon di Festival di Tumba 2020...

Awe nochi lo tin un reunion di AMAK kaminda lo bolbe duna splikashon di e ‘Wild Card’ na lidernan di banda i músikonan partisipante na Festival di Tumba...

Tin hende ku ya kaba, sin ku esaki tuma lugá ku ta bisando ku lo e ta un frakaso, mester duna chèns pa presentá i implementá e plan pa despues ora ku esaki tuma lugá demostrá ku sifra ku ‘Wild Card’ ta bale la pena...

E tim tras dje plan aki a sinta i studia e situashon i ora nan a analisá e oportunidat di ‘Wild Card’ ta duna e partisipantenan un ‘second chance’ pa nan logra klasifiká...

Nos tei move, pa mañan nos lo tin mas informashon pa kompartí ku nos lektornan...

Un bon siman pa bo !...