Un felis dia na tur nos lektornan...

Ayera un kantidat di banda a kuminsá ku nan ensayonan i ya kaba bo por kuminsá mira e fanátikonan ku ta gusta bai ensayo for di ora ta harma e tumbanan...

Henter e ambiente di ensayo di Festival di Tumba ta algu apart, dalmentu di drinks, evaluashon di tumbanan ku ta keda ensayá i tin bia te asta e kompositor o kantante ta tuma komentario di analistanan pa loke nan ta ensayando...

Tin di nan na vários okashon a bai kambia i drecha pa bin bèk ensayo...

Aworakí ku trahamentu di ‘pista’ pa e tumbanan ku ta bai ensayo ta hasi e pasamentu dje piesanan tòg basta fásil pasó e músikonan ta risibí esaki fo’i trempan...

Otro bandanan tin e kustumber di kuminsá for di ‘scratch’ i ensayá kada tumba sin nunka a tende esakinan...

E siman aki tambe ta e siman determinante pa e partisipantenan pa Festival di Tumba Hubenil...

Ensayonan ta kanando bon i djasabra awó lo ta fecha pa kada un demostrá nan talento riba tarima den Festival Center...

Awe EXTRA a kuminsá promové dos di su proyektonan pa Karnaval 50...

E ‘Tertulia ku Reinan di Tumba’ ta algu ku bo mester wak...

Transmishon lo ta djadumingu awor pa 12 or di mèrdia, promé ku e transmishon di inskripshon kuminsá pa 2 or di mèrdia...

Den Tertulia lo bo mira i tende kon kada kantante ta konta nan eksperensia, kosnan chistoso i te hasta loke ku bo no tabata sa di nan...

Ku nan ta kere den kos, nan ta superstisioso, nan tin nan rutina promé ku kada presentashon...

Un konseho, sòru pa bo sigui EXTRA su página di Facebook i tambe kanal di YouTube pa bo no pèrdè e Tertulia aki...

Otro proyekto ta esun ku amantenan di Festival di Tumba sigur lo ta kla pa partisipá na dje...

Entrante awe bo por yega un formulario i partisipá pa gana 2 pakete di Red Carpet pa Festival di Tumba...

Yena e formulario i entregá esaki djadumingu awó na Festival Center den e buzon ku lo tin na e stènt di EXTRA ...

Anochi promé ku nos sera e transmishon lo saka e ganadó di e premio...

Kòrda mas formulario bo yena, mas chèns bo tin di gana!...

E tradishonal kampaña di ‘Rei ken ta sali Rei òf Reina di Tumba 2020’ ta na kaminda...

Esperamos Supermarket ta nos spònser dje kampaña aki kaminda bo tin chèns di gana un pakete kompletu pa bai wak Karnaval ku tur kos di bebe, kome i pasaboka pa bo i bo grupo...

Tin mas na kaminda pa loke ta trata EXTRA den e temporada aki di Karnaval 2020...

‘Louie Louie’ a risibí informashon ku tin algun grupo ku a krese formalmente na miembro loke ta duna impreshon ku sea otro gruponan a pèrdè miembro òf e kantidat di partisipante na Gran Marcha a subi supstansialmente...

Tin bulamentu di kura tambe entre e gruponan grandi...

E trato di miembronan ta hungando un ròl importante den esaki, trato na promé lugá...

Kambiamentu di regla i trato ta pone ku e hendenan ta baha bai laga grupo...

Awe tardi tin e rueda di prensa Hak’e, awe mayoria informashon lo keda kompartí i lo duna informashon tambe riba e set up ku lo tin den Festival Center...

Nos tei move, tabata un plaser, awe un tiki mas kòrtiku, pero mañan nos tei bèk ku dos página kompletu...