Un felis djárason...

For di e rueda di prensa di Hak’e ku a tuma luga ayera tardi bo por saka e konklushon kuantu interes tin pa e evento grandi aki...

No ta wega e loke ku a keda presenta ayera, un kambio total ta bai duna Festival Center ku no solamente 3 tarima pero tambe diferente sekshon pa distrai i rileks tanten bo ta ei den...

E preshon ku produkshon dje evento aki lo ta grandi...

No ta nada fasil pa Manchi, Quincy i Hyacinth para i priminti un set up dje magnitut ku nan a presenta ayera...

Pa loke ta trata e animashon musikal no ta sigur ku un biaha mas ambos dia lo atrae un publiko basta grandi...

Entrante djabierne awor karchinan lo ta optenibel serka e miembronan di Estreno Mas Pikete...

Ensayonan di Tumba a start i nos tin informashon ku te ainda Dolce lo no partisipa na Festival di Tumba...

Mi no sa si ta un desishon definitivo di Klepo i kompania, pero loke a bin dilanti i ku nos a risibi komo informashon ta e hecho ku e invershon pa partisipa na Festival di Tumba ta basta haltu i bo mester yega na un formula pa por sikiera break even...

E ponensia aki nos ta bai di akuerdo kune...

E kos di mas importante ta e hecho ku partisipando na Festival di Tumba i despues bo no tin sufisiente toka den jump in of fiestanan di Karnaval ta pone ku bo chens pa ‘break even’ ta bira mas chiki...

E partisipashon na Festival di Tumba ta keda un invershon ku bo ta hasi pa popularisa bo banda i kompeti den e Festival pa logra e premio mayo !...

Apart di Dolce ma kompronde ku tin algun kantante tambe ku ta evaluando nan partisipashon na Festival di Tumba...

Den un kalkulo ku a keda hasi bo mester di mas o menos 3 mil florin pa por partisipa...

Tin banda no ta kobra, pero otronan ta pone kondishon na e partisipashon loke ta ekivalente na kobra bu pa partisipa ku e banda...

Hopi medionan di retnan sosial ayera tardi na Skerpene...

Ma kompronde mas lat anochi ku a surpasa e kantidat di 65 persona ku a hasi petishon pa akseso na Hak’e komo medio di komunikashon...

Djadumingu awor EXTRA pa di tres aña sigui lo transmiti Inskripshon di Festival di Tumba...

E tim dinamiko di EXTRA ta trahando pa trese otro produkshon kaminda lo bo keda bon informa di tur detaye di e dia di inskripshon dje evento musikal mas grandi di Korsou...

Awe e formulario pa partisipa na e kampaña pa gana 2 pakete pa Red Carpet ta den korant...

Soru pa bo korta esaki, yena e formulario i bin Festival Center djadumingu awor pa bo tira bo formulario den e buzon na e stent di EXTRA...

Bon reakshon riba e ‘Tertulia ku Reinan di Tumba...

E publiko ta interesa pa wak e produkshon prome ku esaki keda presenta...

Djadumingu awor 12or di merdia e Tertulia lo habri e transmishon di EXTRA for di Festival Center...

Ma tuma nota di e preokupashon ku tin ku un grupo di Parada di Tiner ku lo ta un atrakshon i ta atrae masha hopi hoben ...

E situashon aki a trese kune ku e hobennan ku ta studiante na skolnan ku tin kustumber di partisipa na Parada di Tiner, no ta partisipando ku nan skol, pero ta opta pa forma parti di un dje organisashonnan sosial ku tambe tin derechi di forma parti di Parada di Tiner...

Tin segun informashon sigur mas ku 1 skol ku lo no ta partisipando na Parada di Tiner...

Esaki sigur ta di lamenta tumando na konsiderashon ku e intenshon ta pa logra atrae mas skol pa partisipa na e Parada...

Pa loke ta trata e kantidat di gruponan partisipando na Gran Marcha esaki no ta konosi ainda...

Nos a tuma nota ku AGKK a tuma un posishon di ta hopi ketu den e temporada aki...

Ta konosi ku ounke nan ta ninga di ke ta mas embolbi den organisashon di Karnaval, e organisashon no tur ora ta riba mesun frekuensia ku Fundashon JAG...

Esaki ta di lamenta paso e nanishi di ambos organisashon mester ta den mesun direkshon pa bo por traha i logra adelanto pa Karnaval di Korsou...

Na Aruba anualmente nan ta rifa e ‘kavelnan’ pa para wak Karnaval...

Nan manera di atende esaki ta otro for di loke nos a kustumbra kune aki na Korsou...

Na Aruba tabatin mas ku 20 mil persona ku a entrega petishon pa un ‘kavel’ pa por wak Karnaval...

Esaki segun mi ta un kantidat rekort, mi no sa kuantu luga tin pa bo haña un impreshon di e kantidat di aplikashon...

Aki nos sistema segun mi tog ta duna esun ku tin un luga pa para wak Karnaval e chens pa por inverti den su stellage i si bo kumpli ku reglanan bo ta garantisa ku otro aña bo tin bo luga sigura...

Nos tei move, tumba i roadfire ta na ordu di dia na radio, esaki sigur ta trese ambiente na boka di trabou...

Te mañan ku Dios ke!