Bon biní na e promé edishon di ‘Louie Louie rumbo pa Festival di Tumba 2020’...

Meta di e kolumna aki ta pa kompartí informashon relashoná ku e selebrashon di e di 50 edishon di Festival di Tumba pa dje forma ei abo komo lektor keda bon informá di e último desaroyonan pa loke ta trata e preparashon pa Festival di Tumba 2020...

E di 50 edishon di Festival di Tumba lo tuma lugá riba dianan 27, 28, 29 di yanüari i e gran final riba dia 31 di yanüari 2020...

AMAK a instalá un komishon di algun miembro ku a keda di repasá vários aspekto di regla i ideanan nobo ku por implementá pa Tumba 2020...

Ayera nochi direktiva di AMAK a keda pa sinta ku e komishon, pero nos a komprondé ku debí na malesa di un dje miembronan a suspendé e reunion ...

Mañan djárason lo tin un reunion general èkstra ordinario kaminda AMAK lo trata dos punto importante: 1. Protekshon di merkado di Farándula den luna di desèmber i temporada di Karnaval i 2. Festival di Tumba 2020...

AMAK ta den negoshashon ku algun ‘branding partner’ i ta pendiente konfirmashon di nan pa dje forma ei por tene e promé rueda di prensa relashoná ku Tumba 2020...

‘Louie Louie’ a komprondé ku AMAK ta trahando riba un partner stratégiko pa Festival Center. Si logra di yega na akuerdo esaki lo ta un ‘boost’ importante pa e kompleho ku segun informashon lo konosé un transformashon pa Festival di Tumba 2020...

E akuerdo ku Licores Maduro tambe, bálido pa 5 aña, ta un sosten grandi pa Festival di Tumba...

‘Louie Louie’ a komprondé ku tin sigur dos proyekto, meskos ku esun di Coridja Stars Production pa loke ta trata Karnaval, ku ta trahando riba un dokumental di Festival di Tumba...

Un otro proyekto tambe ku tin algun persona trahando riba dje ta e historia, kompilashon di informashon di Festival di Tumba di 2003 bin ariba...

Manera ta konosí, Don Felio Colinet dfm, a kompilá informashon te ku 2003 i a publiká esaki den un buki dediká na Festival di Tumba...

Añanan ‘rondó’ 1980, 1990, 2000, 2010 a konosé Rei òf Reina di Tumba ku a gana e título na vários okashon, na 1980 Harry Zimmerman a gana ku ‘Zjogorogo’ i despues na dos okashon mas a gana e título di Rei di Tumba, respektivamente na 1990 ku ‘E meresé’ i na 1999 ku ‘Nos ta Bibu’...

Hendrik de Windt ku a gana na 2000 ku ‘Dal’e Klave’ a ripití na 2008 ku ‘Den bo brasa mi ke ta’ i na 2011 ku ‘Para den mi Sapatu’...

Na 2010 tabata Doña Elia Isenia a keda korona komo Reina di Tumba ku ‘Mi pueblo a manda mi’, pero promé ku esei Mama Elia a gana tambe na 1991 ku ‘Pia pia man’e un trambia’ i na 2002 ku ‘Awe’...

Ba ripará si ku nan kada un a gana e título tres biaha!, awor den 2020 e kompetensia lo ta un duru mirando ku vários dje eks Rei òf Reina di Tumba lo bolbe kompetí pa e selebrashon di Oro...

Nos a yega na final dje promé edishon di ‘Louie Louie rumbo pa Tumba 2020’, otro siman djamars nos tei bèk... Pa interkambio di informashon bo por mail nos na lacuriel@hotmail.com