Den prensa nan a mira ku tin kambio den proseso, esaki sin konsulta

WILLEMSTAD.- Komishon ku a keda instituí durante reunion di 20 di sèptèmber último ta yama tur grupo di Tambú i Aguinaldo pa un reunion urgente awe nochi 9 or na Club Union Boneriano.

E yamada urgente aki ta bin despues ku no opstante ku Minister van Heydoorn a primintí ku lo e tuma kontakto bèk ku e komishon ku su proposishonnan, e komishon mester a tuma nota den prensa i via retnan sosial ku tin algun kambio pa loke ta trata e prosedura di petishon di pèrmit i kambionan adishonal. Esakinan a keda anunsiá sin tuma ‘feedback’ dje komishon.

Pió ainda Sektor di Kultura ta anunsiá apertura di temporada di Tambú i Aguinaldo, sin a kaba di yega na palabrashon ku gruponan.

E komishon den su karta ku a keda entregá na Minister van Heydoorn a hasi petishon pa tene algun punto na konsiderashon i tambe pa fasilitá gruponan i doñonan di establesimentu.

E puntonan di doló ta entre otro: 1. Un lokèt apart na “Vergunningen loket” pa atendé spesífikamente ku petishonnan di pèrmit pa e temporada di 2023 kaminda tur e trámitenan por tuma lugá sentral akinan; 2. Supsidio di Gobièrnu di Kòrsou pa e gastunan di vigilansia (bewaker); 3. Ahuste den e orarionan di e pèrmit. Proposishon nobo: Den siman: na lugá di 19:00 – 23:00 hasi esaki 19:00 – 00:00 a.m. Den fin di siman: na lugá di 19:00 – 01:00 a.m. hasi esaki 19:00 – 02:00 a.m.; 4. Kampaña di konsientisashon igual ku “Aktua robes sinti’é unbes”, finansiá pa Gobièrnu di Kòrsou.

Tambe gruponan ke kumbiní pa por hasi un tèst dor di organisá aktividat na lugánan ku ke pone gruponan toka pero ku no ta haña pèrmit. Meta di e tèst ta pa e komishon por haña un bista kiko ta e puntonan di mehorashon i pa por traha riba esakinan.

E lugánan kaminda e komishon ke hasi e tèst ta: - Mi lucha - Katy Snèk – Minè. E komishon ke proponé pa e fase di tèst tuma lugá riba dianan 28 i 29 di sèptèmber 2023.

E komishon ta invitá tur grupo di Tambú i Aguinaldo pa manda un òf mas representante na e reunion di awe nochi 9 or na Club Union Boneriano pa dje forma ei tuma un desishon riba e puntonan di preokupashon.