WILLEMSTAD.- Ayera, 13 di mart, e komishon ‘Nightlife’ a tene su promé enkuentro ofisialmente.
E komishon aki a keda lanta 15 febrüari ofisialmente pa un dekreto Gubernamental, ku e meta, pa stimulá ‘Nightlife’, den su nifikashon mas amplio bèk na Kòrsou, tantu pa e turistanan ku ta bishitá nos Pais, komo nos hendenan lokal.
E komishon a keda lantá en prinsipio pa 6 luna, ku chèns pa ampliashon.
E intenshon ta ku e komishon na final  mester presentá na Minister pa Desaroyo Ekonómiko un plan konkreto.
E plan mester bira un guia di kiko ta e diferente kosnan ku mester drecha i tene kuenta ku n’e, pa asina purba rebibá nos ‘Nightlife’ bèk na Kòrsou, tantu den e forma i e diversidat pa aktividatnan i eventonan  na Kòrsou, pero tambe pa analisá nos leinan i wak si esakinan ta kuadra ku e tempu ku nos ta bibando aden.
Mester rebibá aktividatnan den hotèlnan bek, pero mester trese tambe atrakshonnan nobo ku ta atraé e turista i nos hendenan lokal pa bishita. E parti kulinario tambe lo haña su debido atenshon.
Tur esakinan ta yuda krese desaroyo ekonómiko, i al final ta esaki ta e meta.
E komishon fiho ta konsistí di representá di MEO – CTB – CPA-CHATA – Kuerpo Polisial – Asosashon di Músiko i tambe algun persona ku ta den e mundu di aktividat i evento. Banda di e komishon fiho lo tin un sup-komishon di algun persona ku ya nos a aserka, i ku tambe lo bai duna un man pa realisá e meta di e komishon.