WILLEMSTAD.- Fundashon Kultural Seú Kòrsou i Incredible Events ta invitá pueblo di Kòrsou na “Kompetensia Mara Lensu 2020”, ku ya a bira un tradishon den e fiesta di Seú.
Despues di 4 dia di workshop intensivo, kordinadó di e proyekto pa FKSK, sr. Shurendi Pieternella ta sumamente satisfecho i lo trese 12 partisipante ku ta kla prepará pa bai duna un kompetensia den 4 kategoria di Mara Lensu.
E partisipantenan a risibí tayer serka sra. Cenaida van Dinter i Shurendi Pieternella, kaminda nan a siña vários di e tipo di lensunan ku tin, kon ta traha guma i guma un lensu. Tur loke ku nan mester tene kuenta kuné na ora di mara un lensu for di e básiko.
E aktividat ta djadumingu 15 mart próksimo, ta kuminsá for di 2’or di mèrdia ku diferente presentashon, gruponan rítmiko manera Sablika, Hóben na Timon, Den Chikí, baile di Grupo Sembra Alegria, Dj Karlito i hopi sorpresa mas.
Lo tin un bar i kushina bon surti. Entrada ta fl. 3,-- pa persona.
Bini unu bini tur bin sostené i disfrutá di un dushi atardi den hòfi, kompaña pa bon músika i disfrutá di e arte di Mara Lensu 2020.
“Si palu bira tronkon, balor ta na su renchi”.