WILLEMSTAD.- Netti Laurijsen-Kopra a komponé ‘Mi Mama’ ku ta keda kantá pa T’Kayley Polonius.

Tante Netti un ta un deskonosí pa su talentonan manera trahamentu di prenda, pero e ta un kompositor tambe. Den pasado Tante Netti a yega di komponé diferente kansion, entre nan e kansion gospel ‘Yuda nos’, kantá pa T’Kayley Polonius, ku a yega puesto number 1 di Top 25 di un radio lokal na 2018.

T’Kayley:

T’Kayley ta un hóben di 13 aña ku su hòbinan ta kanta, baila, landa i tambe sosialisá ku su amiganan. For di edat relativamente hóben el a kuminsá kanta den un grupo di kanto. Na 2018 T’Kayley a hasi su promé grabashon. Ku ‘Mi Mama’ T’Kayley ta forma un duo ku Tante Netti kende ta rèp un verso dediká na e Mamanan.

E produkshon a keda estrená dos siman promé ku Dia di Mama, pero manera e kansion mes ta bisa den e parti final ku Tante Netti ta rèp: ‘No ta solamente pa Dia di Mama, paso bo Mama ta bo Mama tur dia tòg?, pues ta un kansion ku por wòrdu pidí henter aña.

Huntu ku e kansion a produsí tambe un videoclip ku por wòrdu mirá riba YouTube bou dje nòmber: ‘Mi Mama’ Kayley. Produkshon dje videoclip tabata na enkargo di Jerrel i dj Achi.