KRALENDIJK — Miembro di Konseho Insular di UPB, Esther Bernabela, a denunsiá ku aktividatnan di prostitushon ilegal a bira teribel na Boneiru. Spesialmente bou di hóbennan. Muhénan hóben ta bini tambe for di Kòrsou pa prostituí riba e isla aki. Diputado Nina den Heyer, titular di asuntunan sosial i salubridat, a bisa den reunion di komishon di Konseho Insular ku e ta na altura di e situashon aki.

No ta kualké miembro di Konseho Insular a toka e punto aki di prostitushon. Esther Bernabela ta dòkter di kas ku su práktika den sentro di Antriol, e bario na unda pa tradishon sa tin mas aktividat di prostitushon ilegal. Ta un sekreto públiko ku hustamente den besindario di su klínika tin hopi moveshon di hende muhé ku ta praktiká prostitushon.

Di akuerdo ku Bernabela, na momentu ku a aprobá un maneho di toleransia pa e sentro di prostitushon riba e isla (Pachi’s Place), bista a kita for di prostitushon ilegal pafó di e sentro aki. Pero awor ku e ‘damanan di plaser’ ku tabata operá na e sentro a bai bèk nan pais, debí na e situashon di Covid, prostitushon pafó riba kaya a bira teribel. Ta manera un ‘free for all’ tin.

Bernabela kier a sa di e diputado en kestion ku si e ta na altura di e situashon aki. “Kiko ta hasi? Tin kontròl ta tuma lugá?”

Den su kontestanan diputado Nina den Heyer a bisa ku e sa di e situashon. Tambe el a bisa ku no tin un mekanismo di kontròl médiko di e personanan aki. El a bisa ku e ta preokupá.

Bernabela a reakshoná fuerte: “No ta sufisiente diputado pa bisa ku bo sa òf ta preokupá. Kere mi ku e situashon aki ta serio. E ta teribel. Anto e ta tuma lugá den seno di nos hóbennan. Mi tin bèrgwensa di bisa e kosnan aki, pero mi mester bisa nan pa tur hende sa kiko ta pasando eifó. For di 12 aña kaba nos muchanan ta aktivo riba tereno seksual.”

“Mucha muhénan yòn, bunita i atraktivo, ta bini for di Kòrsou pa prostituí. Despues nan ta kue nan kaminda bai bèk. Nos no sa kiko nan ta laga tras.”

 

 

LAGA UN KOMENTARIO

Please enter your comment!
Please enter your name here