WILLEMSTAD.- Mañan anochi lo tin un konsierto benéfiko riba Freewinds, esaki den kuadro dje selebrashon di 40 aña den Farándula di Melania van der Veen.
Lo tin presentashon di Trio Los Ruiseñores ku ta bèk riba tarima despues di hopi aña. Otro dje gran artistanan ku lo bai tei riba e anochi ta Romeo Heije kende den temporada di Pasku no por keda sin kanta su klásikonan. Boy Thode tambe lo tei kantando su kansionnan di Pasku.
Melissa Arroyo, e presentadó dje popular programa ‘Bo Trai Mèrdia’ tambe lo ta kantando e anochi aki kompartiendo tarima ku su mama, Melania van der Veen.
Huntu nan lo kuminsá hinka bu den e ambiente di Pasku di nasementu i Fin di aña ku kansionnan bunita.
Karchi ta kosta 30 florin i ta optenibel yamando 699-2911.
Porta di Freewinds ta habri for di 7.30 pm i show lo kuminsá pa 8 or di anochi.
Tur ganashi dje konsierto lo keda entregá e mesun anochi na un instansia karikativo.
Un anochi ku género di músika variá i pa esnan riba 50 aña sigur e músika di Trio lo kai na hopi agrado. No pèrdè e konsierto aki!.