WILLEMSTAD- Miembronan di e banda di e isla di Sint Maarten Orange Grove ta organisá awe na Rotterdam un konsierto benéfiko den e sala di konsierto Annabel. Ku e ganashi di e konsierto e banda kier yuda muchanan wèrfano di e isla di Sint Maarten ku a keda sin dak riba nan kabes despues di e pasashi di e orkan Irma.

E instituto kaminda e muchanan wèrfano tabata biba a risibí daño pisa dor di e orkan. E dak kompletu a bula bai. Tantu Michael Maidwell kende ta kantante di e banda komo Jacob Streefkerk ku ta e bahista, na momentu di e pasashi di e orkan tabata na Ulanda. “Nos kier a hasi muchu mas ku para mira sin por hasi nada”, asina Jacob a deklará. “Pasobra asina bo ta sinti bo mes ora bo ta leu for di kas i bo famia ta aya.”

E artistanan ku ta kontribuí ku e konsierto ku ta tuma lugá awe nochi ta entre otro Shirma Rouse, Kris Berry, Trafassi, Brainpower, TLM, Maikel X, Ziggi Recado, Kuenta i Tumba, Patrick Grayham i Elijah Waters. E rekoudashon kompletu ku nan risibí for di benta di karchi ta bai pa e muchanan wèrfano di K1 Brittania Foundation na Sint Maarten.