WILLEMSTAD.- Djamars, 31 di yüli lo tin un konsierto riba Freewinds titulá ‘The Three Diva’s Concert’.
Jill Frans, Gilltaly Doran i Harlianne ‘Yentje’ Silvanie ta bai presentá kansionnan popular na spañó, ingles i papiamentu, respaldá pa un bon orkesta di músikonan lokal bou dje direkshon dje gran pianista Chris Walle.
Aparte di esaki, pa promé biaha Gibi Doran lo ta interpretando un kansion na duo ku su yu muhé, Gilltaly Doran.
Meta dje konsierto ta pa rekoudá fondo pa regalá Kolegio Alejandro Paula instrumèntnan musikal pa e studiantenan por práktika loke nan siña den teoria.
Un investigashon ku a ser hasi pa ‘E Awards Foundation’, ku sra. Jessica Colastica na kabes, a bin saka afó ku na diferente skol sekundario e studiantenan ta hañando lès di músika pero no tin un instrumènt pa hasi práktika.
Sra. Colastica den kombersashon ku sr. Paco Nahr a splika dje situashon sin sa ku e tabata harmando e konsierto riba Freewinds i mesora a ofresé ayudo di su parti na e fundashon pa regalá instrumènt na K.A.P.
E motibu ku a skohe K.A.P. ta debí ku sr. Uti Gregorio, di felis memoria, tabata duna lès di músika na KAP i pa honra e pashon pa músika i bon amistat ku tabatin entre Uti i Paco, Paco a pidi Jessica pa hasi e regalo di instrumènt na e skol konserní. E desishon a kai den masha bon tera serka rèktòr, sr. R. Sillé i mesora el a duna su aprobashon.
Asistí na e konsierto i dje forma ei duna bo kontribushon.
Karchi ta optenibel na Mensing’s Caminada, Radio Mas, serka miembronan di ‘E awards Foundation’ i serka Paco Nahr na 567-8777 òf 673-1146.