WILLEMSTAD.– Despues di tabata ousente aki banda pa 3 luna, Freewinds e fin di siman aki lo regresá Kòrsou i den kuadro di esei, djaluna awor dia 2 di mart pa 8 pm, lo organisá un konsierto yama “Bon Biní bèk Freewinds”, kaminda lo tin presentashon di dos artista lokal. Ta trata aki di e hóben Michael Boncoeur Jr., i tambe e legendario Toni Worrell.
E dos kantantenan aki lo bai pèrkurá pa un anochi inolvidabel. Tur ku tabata presente na un dje último shownan di Freewinds aña pasá na Kòrsou, por a disfrutá di e konsierto Michael & Michael, kaminda tata i yu Boncoeur a entretené e públiko for di komienso te fin.
Di Toni Worrell mes no mester papia hopi. Ta trata aki di un kantante di piesa na ingles, kende alabes ta un dosente di kanto i a siña masha masha hopi hende kanta. Hustamente den esaki, djaluna lo tin un studiante di dje ku lo bai interpretá un duo huntu ku su persona. Na final tambe lo tin un choir ku ta konsistí di  studiantenan di e skol di músika ku tambe lo forma parti di e show.

THE FREEWINDS BAND I NGN BRAZZ
Manera ta e kustumber, e kompañamentu musikal lo ta na enkargo di The Freewinds Band ku ta konsistí di Patrick riba guitara, Susan riba Piano, Jeff riba bass i John riba drùms.
Na Kòrsou, e sekshon di brass lokal ku tei pa aportá den e totalidat ta NGN Brazz, ku ta konsistí di Norman riba tròmpèt, Giovanni riba  trombon i Norbert riba tenor sax. E biaha aki tambe lo forma parti di e brass, Magreet Busstra riba tantu alto sax komo dwarsfluit i tambe Herbert Silonero riba tròmpèt. Pues un five piece horn section pa e show di djaluna awor.

ENTRADA GRATIS
Manera nos a bin ta organisá e eventonan grátis, mester registrá e kantidat di hendenan ku ta bai. Ta p’esei ta hasi un apelashon na tur hende pa manda un WhatsApp na e number +5999 513-0837 i registrá ku kuantu hende bo ta bai e show aki. Please manda WhatsApp i no yama, pasombra e nòmber ei no ta risibí yamada ni normal ni via WhatsApp call.
Despues di un ratu, esnan ku registrá ta risibí un mensahe ku nan ta konfirmá i tambe un e-ticket di entrada. Kòrda ku ta 300 asiento tin den Star Light, kaminda e konsierto ta tuma lugá. Pues esun ku registrá promé ta bebe awa limpi. Kòrda yega tempran pa asina ei bo por haña un bon lugá pa sinta.
Unda Freewinds lo ta mará djaluna awor, esei nos no por bisa ainda. Un i tur ku ta bai mester keda pendiente pa ku e informashon aki.
Pues, djaluna awor, Konsierto Bon Biní Bèk di  Freewinds ku dos kantante lokal, den e kaso aki Michael Boncoueur Jr., i Toni Worrell. Porta ta habri 7.30 pm.  Esnan ku ta bai, wak pa boso ta na tempu.