WILLEMSTAD.- E tres damanan, Doña Mafalda, Shirma Rouse i Izaline Calister a duna un tremendo show djasabra anochi na Renaissance Ocean Front Park. E konsierto ku a konta ku bon asistensia i manera indiká kada un dje artistanan a duna un tremendo presentashon. Doña Mafalda a keda kompaña pa un orkesta bou di direkshon di su yu hòmber, Arnel Salsbach. Shirma Rouse a koutivá e públiko ku su bos i e bon kompañamentu di un orkesta formá pa entre otro su ruman hòmber Ron i e konosido pianista Christopher Walle. Pa sera e anochi, Izaline Calister a presentá ku un orkesta bou di direkshon di Randal Corsen i ku tabata konta ku partisipashon di diferente músiko renombrá. E konsepto ‘Caribbean Queens’ a resultá un eksitoso. Pa loke ta trata e sitio kaminda e evento a tuma lugá, nos ta kere ku Renaissance mester tene na kuenta pa un siguiente okashon pa buska pa eliminá e holó insoportabel ku tabatin djasabra anochi i no lubidá ku si bo promové ku e konsierto lo ta un sinta, mester tin stul pa tur hende.