WILLEMSTAD.- “Na Bo mi debe tur” ta título di un tremendo konsierto pa rekoudá fondo ku lo bai tuma lugá na Betesda djasabra awor, promé di desèmber. E konsierto aki ta organisá pa sra. Shirley Lacruz ku ta un abitante di Betesda pa 10 aña kaba.
Tres aña siguí e ta organisando sena di Pasku pa e abitantenan di Betesda spesialmente esnan ku no sa risibí bishita di famia i konosínan mashá.
Komo ku Shirley no a haña spònser e aña aki i pa hasi su deseo bira realidat el a disidí di invitá su yu, ku ta Jurgen Lacruz and Friends pa por deleitá e públiko riba e anochi aki.
E anochi aki lo bai tin presentashon di diferente artista, entre otro: Angelique Klooster, Liesje Lispier, Diveana Lopez, Veanira Reed, Richard Engelhardt, Lypson Merisier, Tania i Lintje Isenia, Gabriela van der Biezen, Deborah Gomez i un miembro nobo Thallysa Jano yu di konosido, Urvin Jano.
Karchinan ta na balor di 25 florin delantá i na porta. E konsierto lo tuma lugá na Betesda i ta kuminsá pa 7.30 di anochi. Asistí i koperá ku un bon kousa.
Ta konosí ku Jurgen Lacruz and freinds ta trese konsierto na nivel pa e pueblo di Kòrsou.
Pa mas informashon por yama 567-7745 i òf 676-2754.