WILLEMSTAD.- Jurgen Lacruz & Friends dia 8 di yüli próksimo ta organisando un konsierto pa rekoudá fondo. Ken no konosé Jurgen Lacruz, el a hasi 2 konsierto den pasado pa un bou kousa kaminda basta famia di ménos rekurso a risibí un pakete di komestibel komo regalo. E biaha aki e konsierto pa rekoudá fondo lo ta pa por biaha pa Aruba pa duna un solo presentashon na e pueblo di Aruba dia 21 di yüli próksimo. Huntu ku su amigunan Veanira Reed, Angelique Klooster, Liesje Lispier, Richard Engelhardt, Rashid Felida, Diveana Lopez, Lypson Merissier, Lientje i Tania Isenia, Maudienne Espoza, Gabriela Van der Biezen i Harlianne Brazil nan lo ofresé un konsierto ku dos ora di presentashon. Jurgen Lacruz & Friends tin un piesa titulá "Mañan" ku pronto lo ta riba merkado. Jurgen i su amigunan ta pidi pueblo di Kòrsou pa koperá ku nan pa asina nan por hasi e presentashon na Aruba un realidat. E konsierto di Jurgen Lacruz & Friends ta tuma lugá dia 8 di yüli 2018 na ABVO di 7’or pa 9’or anochi. Karchi ta optenibel na Mensing’s Caminada i tambe serka tur e artistanan ku ta presentando na rason di 15 florin den prebenta i 20 florin na porta. Pa mas informashon por yama Jurgen na 676-2754 òf Arshel na 675-4468. Wak pa bo no keda afó paso karchinan ta limitá.