WILLEMSTAD.- Djabièrnè promé di desèmber  ku ta tras di lomba Avila Beach Hotel su Blues Bar & Restaurant a selebrá su di 25 hubileo en grande ku un mahestuoso konsierto di Jazz riba Avila su Octagon plaza. E montante rekoudá pa medio di e konsierto benéfiko a suma finalmente Nafl. 4.376,94 i a opsekiá esaki djaweps pasá na Sentro Kultural Kòrsou (Cultureel Centrum Curaçao/CCC) pa stimulá talentonan musikal i kultural di hóbennan lokal.
A otorgá e chèk durante di e Live Jazz night semanal na Blues Bar & Restaurant. E dos artistanan ku a guia e konsierto di Live Jazz, Hershel Rosario i David “Ronchi” Matthew konhuntamente ku Marloes Schoep (Manager di Blues Bar & Restaurant) i Farley Hollander (Resident Manager di Avila Beach Hotel) a hasi entrega di e chèk na Carolina Nicolaas i Steve Teunis di Sentro Kultural Kòrsou.
Fuera di esaki, studiantenan di Sentro Kultural Kòrsou a presentá den e shou preliminar durante di e konsierto di e selebrashon. Un nota masha pekuliar tabata ku e músiko di mas hóben ku solamente 12 aña di edat ta sobrino di Uti Gregorio (den felis memoria). Uti a presentá i entretené Blues su huéspetnan kasi tur siman pa bastante aña te ku su fayesimentu. Despues di e shou preliminar nos artistanan i músikonan grandi den Jazz a duna kátedra musikal i sòru pa un anochi espektakular ku a kai na satisfakshon di e públiko ku a presensiá e shou. Ta sumamente speshal i úniko ku asina tantu nòmber grandi den mundu di Jazz, desinteresadamente, a logra pa riba mesun anochi ta huntu riba tarima.