WILLEMSTAD.- Harold Martina, pianista klásiko yu di Kòrsou ku un karera internashonal impreshonante, ta tene un konsierto di piano grátis pa hóbennan mañan djasabra 11 or di mainta.
E konsierto ta speshal pa hóbennan ku gusta muzik pero ku no tin masha konosementu di muzik klásiko i ku no sa bishitá konsierto.
E programa ta variá. Di piesanan romántiko di Chopin, te walsnan di kompositornan lokal. Durashon di e programa ta masoménos 1 ora.
E konsierto lo tuma lugá den sala di Sentro Kultural Kòrsou (“CCC”) na Emmastad, pegá ku International School. E konsierto aki ta un inisiativa di Winthrop Curiel Fonds, ku ta kai bou di e ala karibense di Prins Bernhard Cultuurfonds. Winthrop Curiel Fonds ta un fondo ku ta supsidiá lès i instrumento di muzik pa hóbennan talentoso di ménos rekurso. Banda di e konsierto pa hóben Harold Martina ta tene un konsierto djabièrnè anochi pa rekoudá fondo pa Winthrop Curiel fonds. E konsierto aki ta kuminsá mitar di 8 di anochi. E resital aki tambe ta tuma lugá na Sentro Kultural Kòrsou den e sala di konsierto.