WILLEMSTAD.- Djasabra awó dia 24 di febrüari, C.Y.M.F. i Zona Kultural Kòrsou lo ta anfitrion di un tremendo konsierto pa rekoudá fondo pa un bon kousa: “Sister Marie Laurense School”, na Middle Region St. Maarten.
Toni Worrell lo ta riba tarima huntu ku un elenko sumamente interesante di artista: artistanan di konosí, talentonan nobo, pero tambe studiantenan di diferente skol, entre kua Kolegio Alejandro Paula.
Despues ku St. Maarten a keda asotá pa orkan Irma aña pasá, tabatin hopi atenshon pa e hermana isla aki. Pero segun tempu ta bai, ta manera nos tur ta spera ku e problemanan a keda resolvé mágikamente!
Via kontaktonan ku diferente hende na St. Maarten Toni Worrell a bin komprondé ku prinsipalmente sierto skolnan ta den gran nesesidat. Toni a haña riba su kurason pa mobilisá algun artista, grupo i instansia pa organisá un konsierto pa St. Maarten i asina rekoudá fondo pa e skolnan aki. Entre esnan ku a duna un man pa realisá e konsierto aki ta: C.Y.M.F. e skol di músika di Toni, Zona Kultural Kòrsou, Tramm Imaging i Konseho di alumnonan di Kolegio Alejandro Paula. P’esei Pueblo di Kòrsou, no keda atras! Bin sostené e esfuersonan aki ku bo presensia i gosa alabes di tremendo entretenimiento musikal.
Den esfera di e kousa, diferente artista lo deleitá bu ku músika ku mensahenan  positivo: gòspel i tambe otro géneronan ku nos tur gusta tende. Lo bai ta un anochi sumamente plasentero.
E konsierto aki lo tuma lugá djasabra, 24 di febrüari i lo kosta 30 florin. Nos ta spera bo apoyo en grande!! Bin gosa di un show magnífiko, den bon ambiente pa solamente f 30,- i sostené hubentut di St, Maarten.
Bèl pa bo karchi awe mes: 528-2405, 677-6497 o 465-3582 i kumpra bo karchi pa djasabra awor. Kòrda: “2gether we are 1”. Nos  duna un  man awe, Nos lo haña bèk ora nos mester.