WILLEMSTAD.- E hóben Sendly Sendar ta un ehèmpel pa tur esnan ku ta pensa ku ora un persona tin limitashon e no por funshoná den komunidat. Sendly Sendar no opstante su limitashonnan, tin un abilidat. Esei ta di organisá kos pa hasi hende kontentu.
E organisashon ta un di esnan ku ta yuda e hóben aki dor di dun’é e sala riba Freewinds pa e por organisá su eventonan i asina generá entrada pa e biba tambe.
Ya den pasado atraves di añanan diferente ta e artistanan ku a bin ta yuda Sendly dor di kontribuí kuné kantando. Anto te ainda tur e konsiertonan ku el a organisá tabata masha gustá i eksitoso.
Djamars awor  dia 24 di yüli lo bai tin un anochi diferente riba Freewinds ku Kòrsou su kantantenan mas gustá riba tereno di Bolero, montuno i músika di ayera ku el a titulá “E Reina mei mei di e Rei nan”.
Kantantenan ku lo bai tei ta: Romeo Heije ku su bos di oro kantando  su hitnan grandi di tur tempu. Tambe lo tei e bolerista nòmber unu di Kòrsou, Dennis Cecilia.
Huntu ku nan lo bai tei e kantante nòmber unu den e género di músika kòmbèk, Kenneth Hooi. Kenneth Hooi kende ta kantante di e banda “Forsa Dos” atraves di añanan a bira e kantante ku ta pega mas hit tantu aki, komo na Ulanda.
Pa koroná e anochi aki e Reina mei mei di e Rei nan lo ta Melania van der Veen.
Kontrali na su último presentashonnan riba Freewinds, Melania lo ta kantando dos di su hitnan aktual i tambe e lo kanta ku Kenneth Hooi.
Karchi ta optenibel na Beep Beep Rio i tambe 24 Uur uit de muur. Tambe por reserva i kumpra karchi na 515-6193. Show ta kuminsá 7.30 en punto.