WILLEMSTAD.- Ayera tardi Randal Corsen i Dibo Doran a presentá nan proyekto ‘Mama pa Semper’, un show spesial pa mamanan di tur edat.
Randal Corsen e gran músiko pianista internashonal yu di Kòrsou, kende dia 4 di mei lo bai risibí  e premio “Cola Debrot”, huntu ku e talentoso hóben músiko/kantante/kómiko, Dibo Doran, ta trese e gran show  aki.
E show lo wòrdu kombiná ku un tiki di humor i hopi músika di tur género i riba nivel pa e públiko presente por gosa. Tur esaki lo tuma lugá dia 13 di mei 2018 na Octagon Plaza na Avila Beach Hotel.
Ta bon pa menshoná ku Randal Corsen i Dibo Doran tin vários proyekto ku nan a hasi huntu den e añanan tras di lomba,  e kolaborashon entre Dibo i Randal a kuminsá na 2016, kaminda Randal a invitá  Dibo pa forma parti di su Big Band den e konsierto di  selebrashon di 100 aña di MCB. Despues di esaki a sigui vários proyekto den kua Randal a invitá Dibo partisipá, manera ‘Tribute to Al Jarreau’, ‘Thxgiving concert’, ‘Salsa De Los Bravos’, ‘Paranda di Fin di Aña’ i tambe Dibo ta forma parti di Randal Corsen Orchestra.
Dibo di su banda a invitá Randal komo areglista di e piesa debutante di su agrupashon musikal One i pa ta su direktor musikal i areglista durante Festival di Tumba 2018.
Pa e okashon aki Randal a forma un grupo ku ta konsistí di algun di su músikonan di primera ora, ku ta músikonan di taya manera Pernell Saturnino, Eric Calmes i Lonte Conradus. Pa kompletá e grupo i komo “chèri riba e bolo”, nan lo ta kompañá pa ‘Antillean String Quartet’, pa duna e muzik un toke speshal, pues ta algu masha interesante pa mira i skucha!
E konsierto aki ta konta ku presentashon algun invitado speshal ku sigur lo hala masha atenshon.
Un di e invitadonan speshal ta Grupo Serenada, ku tin mas ku 40 aña ta deleitá  nos pueblo ku muzik folklóriko i popular di Kòrsou, den nan kombinashon remarkabel di harmonisashon vokal i instrumèntnan i ritmonan típiko di nos isla.
Bou direkshon di e direktor musikal Henri Moen; Serenada lo presentá no solamente algun ‘highlights’ di nan repertorio, pero tambe nan lo bai presentá den kombinashon ku Dibo i Randal.
Otro di e invitadonan speshal riba e anochi aki lo ta e popular kantante/kompositor di diferente kansionnan popular i hitnan klásiko lokal,  Gilbert "Gibi" Doran,  kende tin un trayektoria largu i eksitoso tantu riba su mes komo su agrupashon musikal Gio Fuertisimo. Gibi ta e kompositor lokal ku tin mas komposishon riba su nòmber. despues ku e tabata den eksterior relashoná ku su salú e no a duna ningun presentashon pa pueblo di Kòrsou, Gibi Doran lo paresé bèk riba esenario den e konsierto aki. Ta promé bes ku lo mira Gibi Doran, Randal Corsen i Dibo Doran huntu riba esenario den e formashon aki, Gibi lo bolbe topa bèk ku su grupo di pasado ku ta Grupo Serenada den kual tambe el a militá.
E legendario Oswin ‘Chin’ Behilia tambe lo ta un di e invitadonan speshal durante e konsierto:
‘Mama pa Semper’.  Oswin ‘Chin’ Behilia, konsiderá komo un di e kantante/kompositornan  mas destaká di Kòrsou, lo presentá algun di su piesanan mas popular, kompañá pa Randal i su músikonan.  Chin Behilia a yega di presentá na mas okashon komo invitado speshal den proyektonan di Randal, manera na aña 2004 durante North Sea Jazz Festival na Hulanda i na 2008 den sala grandi di Concertgebouw na Amsterdam ku Randal Corsen & Friends. Despues di vários aña nan lo bai topa otro atrobe riba tarima i na e okashon aki Dibo tambe lo djòin, kantando piesa den duo ku Chin.
Karchinan pa e konsierto ta optenibel na Avila Beach Hotel, Mensing’s Caminada, 24 uur uit de muur i na Beep Beep Rio Canario.
Porta ta habri 6’or di atardi i e konsierto ta kuminsá pa 7’or di anochi.
Pa tradishon konsiertonan na Avila ta kuminsá na ora, pues tur hende bin tempran pa no pèrdè nada di e konsierto aki.