WILLEMSTAD.- Djasabra dia 13 di òktober awor, lo tin un konsierto pa rekoudá fondo ku lo tuma lugá riba e barku Freewinds. Ta trata aki di un konsierto, kaminda e entradanan lo bai pa e organisashon Sea Turtle Conservation Curaçao i tambe un parti pa kubri e gastunan di partisipashon di Miss Earth Curaçao 2018, esta Alexandra Atalita ku na e momentunan aki ya ta na Manila, Filipinas.
Manera ta konosí, den su afan pa hasi mas hende konsiente di nan medio ambiente, Alexandra Atalita a haña un amor grandi pa e organisashon Sea Turtle Conservation Curaçao.
E dianan ku e tabata na Kòrsou, el a fungi komo boluntario di e organisashon aki i te hasta a sambuyá huntu ku hendenan di e organisashon pa trata na yuda un turtuga ku anzue  pegá den su boka.
Sea Turtle Conservation Curaçao ta un organisashon ku konstantemente mester di un yudansa pa asina ei nan por sigui hasi trabounan positivo pa komunidat.
Banda di esaki, Alexandra Atalita su partisipashon na Miss Earth 2018 ta unu bastante kostoso i riba inisiativa di Freewinds, nan a pone e fecha di 13 di òktober disponibel pa asina ei por organisá un konsierto pa rekoudá fondo pa tantu Sea Turtle Conservation Curaçao, komo pa yuda Alexandra Atalita den su partisipashon na Miss Earth 2018, ku lo tuma lugá dia 3 di novèmber awor.

E KONSIERTO
Pa Loke ta trata e konsierto, lo tin partisipashon di Tony Worrel i tambe Kadir Snijder, dos kantante ku no mester di ningun introdukshon. Tambe ta trahando riba un kantante mas di sorpresa. Asina ku esei ta kla lo anunsi’é.
The Freewinmds Band lo ta esun ku lo kompañá e kantantenan aki i tambe lo tin partisipashon di NGN Brazz ku ta konsistí di Norman, Giovanni i Norbert riba respektivamente trompèt, trombon i saxo.

PREIS DI ENTRADA
E preis di entrada pa e konsierto pa rekoudá fondo aki ta di 25 florin. Pa reservashon di karchi mester yama 513-0837 o 569-3977. Si instansianan ta interesá pa kumpra karchi na gran kantidat, por hasi entrega di esakinan tambe.
Di parti di Alexandra Atalita ku ayera djaweps a aterisá na Manila,  e ta sigur ku pueblo di Kòrsou lo partisipá den e konsierto aki dor di kumpra karchi i asina aportá na un kousa bon i positivo. E mes ta pendiente pa riba e fecha aki laga pasa un grabashon ku e lo hasi for di Filipinas pa pueblo di Kòrsou.