WILLEMSTAD.-  E konsierto & Show titulá “NUNKA ENTREGA” di Shamiro Anita, ku lo tuma lugá djasabra awor 30 di sѐptѐmber den Internationa School ta surpasando tur ekspektativa konsiderando e kantidat di personanan, gruponan i instansianan ku lo bai e evenementu aki pa gradisí Dios i eksperensia e Brasa di Dios ku por Move Tur Montaña, Kalma Tur Tormenta i duna forsa pa Nunka Entrega

Karchinan pa e konsierto aki ya ta kabando. Shamiro mes ta gradisí Dios na promé lugá. E gran konsierto aki a bira posibel danki na sosten i koperashon di vários persona, iglesia/misa i kompanianan ku a sea regalá empleadonan, spònser, i/òf hasi donashon pa institutonan di nos hóbennan, personanan desabilidat i nos grandinan karchi dje konsierto pa nan tambe por bai alabá i gradisí Dios, gosa dje show espektakular aki.

Ta trata aki dje kompanianan Refineria Isla, UTS, TeleCuracao, Lovers, CBA, Total Services,  Gompers Cooling, Café Barista, Tramm Imaging, Fundashon Bon Intenshon, Japan NV, Acoya Hotèl i CFS Solutions. Tin hopi espektativa ku e konsierto aki lo bai krea un ambiente bendishoná di pas i speransa konsiderando tur loke Dios lo bai laga sosodé durante di e konsierto & Show aki.

Den e konsierto aki Shamiro lo bai motivá tur esnan presente pa Nunka Entrega i sigui perseverá maske kon duru e bataya ta, paso Dios semper tei pa yuda i den Dios nan soñonan lo realisá. P’esei Shamiro ta hasi un invitashon pa bin eksperensiá e Poder di Dios den un anochi inolvidabel.

Ta bai tin un tremendo banda, hopi músika ku ritmo varia kombiná ku Show di Baile, Stilt Walking, SkyDancing, Light & Fire Show, Laser Finger Show i hopi sorpresa mas. Lo tin kantikanan na Papiamentu, Spañó i Ingles. Lo tin un kor grandi yama “Gods Angels” i un kombinashon di gruponan manera Adonai, Danzando A Sus Pies, Nemae-Last, i Excel Arts Academy. Komo artistanan invitá di Kòrsou lo tei Angelique Klooster i Eliazar el Mensajero. Direktamente for di Venezuela lo tei Rosana Casares i for di Sto. Domingo Yessie Cuevas.

Mirando e kantidat di karchinan ku ya a bai, por bisa ku International School lo ta yen yen djasabra awor 30 di sѐptѐmber. Portanan lo habri for di 7 pm i 7.30 pm nèt lo kuminsá ku un gran sorpresa, p’esei ta bale la pena yega na tempu. Shamiro ta yama danki di kurason i manda bendishon pa tur ku a kooperá di un forma òf otro i tambe na tur ku a kumpra karchi.

Un danki di kurason e ta manda tambe pa tur medionan di komunikashon ku sigur a yud’e hopi i tambe na tur su spònsernan. E último karchinan ta optenibel tanten tin mas na Mensing, Kas Di Beibel, Tik Tak, Beep Beep, 24 Uur Uit de Muur òf via telefòn 562-2233.