Tres kònteiner kargá ku material pa atleta- i huradonan

WILLEMSTAD.- Konsulado di China aki na Kòrsou djasabra 14 di yanüari 2017 di forma ofisial a hasi entrega di material nobo di atletismo na Curacaose Atletiek Bond. Un regalo na un kosto di alrededor di US$ 100.000.

Kònsùl Zhangweixin di China tabata presente personalmente djasabra último den Stadion Ergilio Hato, kaminda ademas di hasi entrega di materialnan el a dirigí su mes na atletanan di Kòrsou.

Di parti di presidente di federashon lokal di atletismo Willem Cordilia, Mundu Deportivo a komprondé ku ta trata di un regalo hopi grandi i sigur di apresiá. Tantu e kompra di material na China, e transporte i tur demas gastu envolví, a kore pa kuenta di Konsulado chines.

Ta trata di 3 kònteiner bon kargá ku delaster un material i e diferente implementonan ku e federashon lokal a haña komo regalo. Ta papia di sper, bala di heru, instalashon kompleto pa bula haltu i pa pole-vault, material pa hurado, etc., etc.

Pues e echo ku presidente Willem Cordilia a tuma e kurashi dos aña pasá pa presentá Kòrsou komo sede pa CARIFTA, ya kaba tin un efekto positivo pa atletismo lokal awor ku a haña kantidat grandi di material.

For di siman pasá a kuminsá usa algun dje implementonan, manera disko, bala di heru i sper, pero asina mes ainda tin un kantidat grandi di esakinan ku lo keda den kònteiner pa uso durante di CARIFTA.

...Atleta Kgevin Kook a batisá e donashon di parti di Konsulado di China, hasiendo e promé buèlta riba e mat di ‘high jump’...