WILLEMSTAD.- Komo bosero pa Bario Boca Samí, sra. Jacinta Constancia ta sumamente kontentu i orguyoso ku a skohe Bario Boca Samí pa organisá e sertámen  di “Reina Seú”.
Alabes sr. Carlos Zimmerman ku ta e motor tras di e evento grandi aki i ku alabes ta oriundo di Bario Boca Samí riba e anochi aki lo hasi e akto ofisial di pasa e batuta over pa e hóben talentoso ku lo sigui ku e trabou balioso aki.
Grandinan ta bisa ku e dia aki lo “Mara kabuya bieu na kabuya nobo” pa sigui garantisá kontinuidat di un bon trabou . Bario Boca Samí no solamente ta invitá pueblo di Kòrsou i propio paisanonan pa bin disfrutá di un show espektakular djasabra 6 di aprel 2019  20:00 (8 or) di anochi,  pero tambe pa bin ku un bunita komportashon ku lo komplementá e momento históriko aki.
Alabes aparte di lo disfrutá di un ambiente agradabel i fresku kantu di laman, kada un invitado lo presensiá momentonan históriko ku kada kandidata basá riba propio abilidat i talento lo purba trese e mihó dilanti.
Lo tin tur e fasilidatnan nesesario pa abo komo invitado wòrdu bon sirbí.
Mi tin sigur ku e show di djasabra 6 di aprel 2019 lo habri porta i un “Era “ nobo  pa Bario Boca Samí i su habitante i organisashon/negoshinan hala  huntu pa sigui trese aktividat nan grandi i na nivel den futuro !!!
Un danki na Pipi, Chuku, Ibi, Gildo, Mayra Place, Fito Place , Grupo di limpiesa, tur negoshi i abitantenan i Fundashon Seú ku a koperá pa djasabra por ta un éksito rotundo.
Danki na tur Grupo di Seú i partisipante pa a aseptá Boca Samí.
Na final sra. Jacinta Constancia komo bosero i na nòmber di Bario Boca Samí ta pidi pueblo pa bin disfrutá djasabra i presensiá momentonan  espektakular ku Boca Samí so por ofresé. Kòrda koperá i pone bo outo den kurá di kas di un habitante òf na stadion Jong Colombia, mantené área liber pa evitá peliger innesesario.
Bin ku un ánimo pa disfrutá, apoyá kandidatanan i pasa un ratu bon i plasentero.
Finalmente sra. Jacinta Constancia ta enfatisá ku Fundashon  Seú i Bario Boca Samí ta warda bu.