WILLEMSTAD.- Djasabra mainta tempran tur ‘stakeholder’ di Karnaval a reuní na Jan Noorduynweg pa dje forma bai wak e situashon di e kaya i si vehíkulonan grandi lo por pasa riba e subidanan ku resientemente a keda instalá riba e kaya. E situashon di e ‘midden berm’ tambe a keda kontrolá.
Den kombersashon ku presidente di AGKK, Sr. Henny Reinilla, por a komprondé ku  no tabatin problema ku e ‘subidanan’, pero mas bien ku e ‘middenberm’ ku a keda konstruí.
Na e krusada di Brazilweg/ Jan Noorduynweg/ Schonegevelstraat a konstatá ku e treilernan mester lora e bògt skèrpi pa evitá ku e ta bai pega riba e ‘middenberm’ ku a keda instalá riba e ‘subida’.

Un proposishon ku tin ta pa pone tur grupo na un banda di kaya i usa e otro banda pa vehíkulonan ku yega lat por yega nan grupo.
E situashon ta un tiki di preokupashon, pero a keda pa trese adaptashon na e midi di e ‘saya’ ku e treilernan tin pa evitá ku nan ta pega. Ta pendiente pa próksimamente yega na un solushon pa e situashon.