WILLEMSTAD.- Djadumingu dia 3 di desèmber último Kor di Maestronan Penshoná tabatin otro eksitoso presentashon na edifisio di PWFC.
E repertorio tabata kompletamente nobo i tema tabata:

 “Ban bèk, ten ‘i nos ten”
Sin hasi ningun propaganda e presentashon tabata “sold out”. Mirando ku hopi hende a keda desapuntá ku nan no a haña karchi,  e presentashon aki lo wòrdu ripití dia 11 mart 2018.
Públiko presente a gosa masha hopi mes i tabata kanta ku hopi zjeitu i hopi smak huntu ku e kor. Minister Alcalá-Wallé kende tambe tabata presente a duna masha balor na e tipo di eventonan asin’aki  ya ku por konsiderá ku e kor aki ta kontribuí pa konservá un parti di nos patrimonio nashonal i ta sòru pa esaki no bai pèrdí.
Kor di Maestronan Penshoná a probechá pa duna un rekonosimentu spesial na 3 di nan miembronan ku riba e tereno di músika a duna un kontribushon balioso i ku sigur ta bale la pena rekonosé .  Ta trata di :
Sra. Enid Hollander Merkies a lanta e grupo di mucha Zjozjolí kende pa masha hopi aña a deleitá tantu hende grandi komo nos muchanan; Sra. Milan Getrouw ta fundador i dirigente di Kor Fayalobi i te ainda ta aktivo riba e tereno aki i Sra. Isaira Gomes-Mauricia ta organista pa 40 aña di Kor Santa Rosa de Lima i pa masha hopi aña a duna lès di Kuarta na diferente skol i sentro di Bario aki na Kòrsou.
Kor Maestronan Penshoná por mira bèk riba un eksitoso atardi i un biaha mas ta konvensí ku e manera ku e públiko a akudí ta muestra ku tin un nesesidat pa e tipo di presentashon nan aki.
Tantu e dirigènt di Kor Sr. Frank Francisca komo e Maestro di seremonia Sra. Grace Goede tabata enkantá ku e manera ku e públiko a disfrutá di e presentashon.
Kor Maestronan Penshoná kier probechá pa deseá henter pueblo di Kòrsou un Felis Pasku i un Próspero Aña 2018. Riba e potrètnan por mira momento di entrega di e plakat na e 3 miembronan pa a pone den spòtlait. Potrètnan pa kortesia di Sr. Anthony Haile.