WILLEMSTAD.- Kor Maestronan Penshoná (KMP) a bira ya un konsepto den nos pais. Hendenan ta keda pidí pa mas konsierto i KMP ke kumpli ku nan deseo, manteniendo sí un máksimo di 3 konsierto pa aña. Manera kustumber, for di inisio di e kor tur su konsiertonan tabata ‘sold out’. Ta papia akí di 16 presentashon na tur.
Por konstatá ku satisfakshon ku KMP, ku ta konta ku 65 miembro, a yena un bashí ku tabata eksistí riba tereno musikal, loke ta hasi miembronan di e kor hopi orguyoso di por forma parti di KMP. Ta trata di un kor ku ta konsistí di maestronan di skol penshonado bou di guia di e konosido dirigente sr. Frank Francisca, ku ta keda kompañá pa un elenko di 12 músiko. Repertorio di KMP ta konsistí di kansionnan popular na diferente idioma for di añanan 60 bin ariba. Esaki ta trese sierto nostalgia serka e públiko ku tambe ta kanta di su alma, rekordando su hubentut.
Dia 26 di aprel benidero KMP ta ripití su konsierto di luna di desèmber pasá “Ban bèk ku satisfakshon, skuchando kansion ku tabata trese pashon”. E presentashon aki ta tuma lugá di 3.30 – 6.00 p.m. den ouditorio di edifisio di PWFC.
Por haña karchi na Mensing’s Caminada i serka miembronan di kor. Pa mas informashon por yama 737-3991, 526-2854 òf 526-2788. Kumpra bo karchi na tempu pa no keda defroudá!.