WILLEMSTAD.- Kas di Kultura i Kor Maestronan Penshoná ta invitá henter pueblo, pero spesialmente grandinan den nos komunidat, pa bin presensiá e konsierto “Ban bèk ku legria i gratitut, rekordá nos hubentut”.

Esaki ta den kuadro di selebrashon di Siman di kultura i tambe di Dia di grandinan riba 1 di òktober i ta tuma lugá djabièrnè awor 30 di sèptèmber 2017 di 5.00 – 7.00 or den Teatro Luna Blou.

Ta warda tur hende bin kanta i disfrutá di e nostalgia ku e kantikanan lo sembra indudablemente den kurasonnan. Manera ya a bira kustumber Kor Maestronan Penshona a demostrá ku nan konsiertonan ta unu masha plasentero pa presensia.

Spesial e rekuerdonan plasentero ku e konsiertonan aki ta trese ta pone ku hopi hende kada biaha ku e grupo presentá, ta sòru di ta presente. Ta pa e motibu ei e aktividat aki ta wòrdu organisá na un orario ku ta pone ku tur hende por asistí i regresá kas na tempu.

Kas di Kultura mirando e impakto ku e Kor aki a hasi ku plaser a invitá e kor aki pa ta forma parti di e siman di kultura. Si den pasado bo no por a asistí, ata bo chèns pa asistí i pasa un atardi hopi plasentero.

Karchi di entrada na balor di F 15,- ta optenibel na Kas di kultura i na kaha di Teatro Luna Blou. Tur hende ta bonbiní.