WILLEMSTAD.- Despues ku durante di 30 aña konsekutivo Kor Santa Rosa di Lima a brinda fielnan i públiko en general un konsierto den ambiente di Pasku di Nasementu den misa di Santa Rosa i tambe vários aña den SEHOS, dos aña pasá pa  vários motibu dirigènt, direktiva i koristanan a disidí na será e kapítulo di konsierto. Pero despues di 2 aña e kor ta bèk pa duna un konsierto di Pasku. E motibu ta ku e koristanan ta na altura di e nesesidat finansiero pa  mantenshon dje edifisio dje misa di Parokia di Santa Rosa. P’esei huntu  ku 3 otro kor a disidí na bini bèk ku un konsierto di Pasku pa rekoudá fòndu pa e misa. Huntu ku Kor Kanto i Kuèrdè, Kos Los Carmelitas, Kor New Generation a prepará un konsierto ku ta tuma lugá djadumingu 16 di desèmber den misa di Santa Rosa.
E konsierto di kuminsá 7.30 i entrada ta 25 florin. Por haña karchi serka e miembronan dje kornan ku ta partisipá, den sakristia despues di misa i, si sobra, na porta e anochi dje konsierto. Tur loke ku generá lo keda entregá na Pastor i Komishon di Parokia despues di kita gastunan .
E kornan tur ke mira e misa yen yen di hende ku ta bin pa skucha bunita kantikanan di Pasku i alabes yuda ku un bon kousa, esta krea fondo pa mantenshon di nos misa di Parokia di Santa Rosa.