WILLEMSTAD.- Di un òf otro manera semper el a keda prominente den urban. Esnan ku konosé, sa ku ORI no tin purá, aunke ku últimamente e ta poniendo tur hende na kareda, e piesanan ta saliendo un tras di otro.
Resientemente ORI a bolbe manda un ‘real life story’ radio, titulá “Kore” e bes aki género musikal ta rap i produsí pa Alex Sargo i Ziggy Sensato.
Den ORI su mes palabranan, “ tin ora nos ta kore pa realidatnan di bida, i finalmente nos mester enfrentá òf biba ku sierto situashonnan ku semper nos a neglishá òf jùist kore p’e. E track huntu ku e video clip ta ilustrá un di e situashonnan ei. E mensahe ku ta kore manera un liña kòrá den e piesa ta simpel, “Balorá e kosnan, don't take nothing for granted!”.
Ta importante pa wak e videoclip, e mensahe sigur ta unu poderoso i di e tempunan aki, na unda ku tin bes stabilidat relashonal ta na último lugá, esaki ku tur konsekuensia ku ta bin kuné. Fanátikonan mester keda pendiente pa otro kansion nobo ku pronto lo keda lansá; ORI ta trahando riba un otro track titulá “Undercover”.
Miéntras nos ta warda e próksimo pasonan di ORI ta invitá fanátikonan pa siguié riba Instagram /Facebook of SnapChat @OriMuzic. Fanátikonan por mira e videoclip “Kore” riba e Youtube Channel @decodedofficial òf solisitá e track na nan radio preferí. Tambe, por stream riba ITunes, Spotify, Google Play i Apple Music.