Análisis dje situashon den Liga A, Grupo B Concacaf Nations League

WILLEMSTAD.- Bou di e konstelashon aktual, Kòrsou a yega na su máksimo potensia den futbòl internashonal den e sirkulo di Concacaf. Esei ta e konklushon ku por saka despues di a presensiá e partido di ayera nochi.

Kòrsou a keda algun ‘size’ bou dje nivel di Costa Rica, un pais mundialista ku a pone nos realisá kiko ta e posishon real ku nos ta okupando na e momento aki ora ku ta trata di futbòl.

Ku e derota di 2-1 sufrí ayera nochi, Kòrsou su paso práktikamente a keda kòrtá pa hunga e buèlta final di Nations League. Esei, sinembargo, no ta nifiká ku tur lus a paga.

Posishon di ekiponan den Liga A, Grupo B di Concacaf Nations League ta interesante.

Si Haiti gana 1-0....

Costa Rica ku Kòrsou tin 5 punto kada un, miéntras ku Haiti tin 2 punto. Djadumingu awor selekshon di Haiti lo ta na Costa Rica. Un viktoria 1-0 pa Haiti, ta hasi e situashon masha interesante ya ku e ora ei tur tres pais tin 5 punto i tur tres tin 3 gol na fabor i 3 kontra. Den un kaso asina tin ku bai husga (probablemente) asuntu di karchi risibí, pues karchi kòrá, karchi gel, etc. Tuma nota ku tantu Haiti komo Costa Rica a haña un karchi kòrá...Kòrsou no!

Kualke otro resultado...

Kualke otro resultado djadumingu awor lo ta na fabor di Costa Rica, ku eksepshon si Haiti sorprendé ku un goliada. Miéntras e situashon ta positivo pa Costa Rica, esei ta duna Kòrsou chèns pa finalisá na 2do puesto i klasifiká pa Gold Cup 2021.

Tene kuenta ku e Nr. 3 dje grupo lo degradá pa Liga B i lo mester pasa un ruta poko mas largu pa drenta Gold Cup den 2021.

E konklushon: Ta kumbiní Kòrsou pa Haiti gana 1-0 ya ku esei ta pone tur tres pais riba mesun nivel i Kòrsou ku bentaha den asuntu di karchi. Si Haiti no gana 1-0, anto lo kumbiní Kòrsou sea un empate òf pa Costa Rica sali viktorioso i laga Kòrsou na di dos lugá.

Echo ta ku awor aki nada no ta den nos man, sino ta dependé di kiko e dos otro paisnan lo hasi djadumingu benidero.

Pais
H
G
E
P
GOL
Saldo
Pt



1. Costa Rica
3
1
2
0
3-2
1
5



2. Kòrsou
4
1
2
1
3-3
0
5



3. Haiti
3
0
2
1
2-3
-1
2














Nr. 1 Ta klasifiká pa semi final Nations League i 2021 Gold Cup


Nr. 2 Ta klasifiká pa Gold Cup 2012






Nr. 3 Ta degradá pa Liga B. Drenta Gold Cup 2021 den 2da buelta