WILLEMSTAD.- No ménos ku shete atleta yu di Kòrsou ta forma parti dje delegashon di Hulanda ku dianan 1e i 2 di mei próksimo lo tuma parti den Kampionato Mundial di Relevo na Polonia. Direktor tékniko di Atletiek Uniek Ad Roskam, ayera a anunsiá ku Hulanda lo keda representá riba 5 disiplina, kual nan ta 4x100m. maskulino i femenino, 4x400m maskulino i femenino i 4x400m miksto.
World Athletics Relays lo tuma lugá den Slaski Stadium na Slaski Park, Chorzow. E ekiponan hulandes 4x100m maskulino i 4x400m femenino ademas di kompetí den World Athletics Relays, tambe a klasifiká kaba pa Weganan Olímpiko. E otro ekiponan hulandes tambe ta buskando nan ticket pa Weganan Olímpiko di Tokyo komo tambe kualifikashon pa Kampionato Mundial di 2022 na Oregon, USA. E team hulandes aktualmente ta den preparashon na Turkia.

Ramsey Angela i Lie-marvin Bonevacia...

Pa loke ta trata e atletanan yu di Kòrsou, esakinan ta:
*4x100m: Taymir Burnet, Churandy Martina, Christopher Garia, Hensley Paulina. Tur ta di Rotterdam Atletiek.
*4x400m maskulino i mix: Terrence Agard (Haag Atletiek), Ramsey Angela (PAC, Rotterdam) i Liemarvin Bonevacia (Rotterdam Atliek).
Mas aleu Hulanda tin ekipo 4x100m femenino pa kua Nargelis Statia a yega di haña invitashon, ounke awor aki esei no ta e kaso. Ainda e por buska pa drenta e team aki pa Weganan Olímpiko.