WILLEMSTAD.- Kòrsou tabata praktikamente plat ayera nochi na momentu ku e sertámen di Miss Universe a kuminsá. E espektativanan ku partisipashon di Akisha Albert na Miss Universe tabata bastante haltu. Durante dje último 2 simannan sigur tur dia bo por a sigui informashon di Akisha for di Tailandia kaminda ku e sertámen a tuma lugá. Sea Akisha mes ku tabata bai ‘live’ ku informashon di kon e ta eksperensiando su partisipashon òf tabata Gionel Virginie, komo miembro dje tim di sosten di Akisha ku tabata presente na Tailandia ku tabata informá i duna tur detaye di tras di kortina. Ayera nochi nos Akisha a lusi enorme, bunita i ku e konfiansa el a sa di representá su pais di un forma digno i ku sigur ta di aploudí. Fo’i na momentu ku Akisha a logra di ta den e Tòp 20 ya bo a kuminsá sinti ku nos Miss Kòrsou ta rumbo pa algu grandi. Ora ku a anunsiá Akisha den e Tòp 10 huntu ku representantenan di Sur Afrika, Vietnam, Venezuela, Filipina, Costa Rica, Nepal, Canada, Thailand i Puerto Rico, e situashon a bira un di lokura total. Finalmente Akisha ta kai for di e Tòp 5, pero pa nos Akisha ta keda nos Reina!. Pa loke ta trata e resultado final, Venezuela a keda komo segundo finalista, Sur Afrika komo promé finalista i Miss Universe a resultá, Miss Filipina.