WILLEMSTAD.- Manera a keda antisipá, e partido di djasabra anochi entre Kòrsou i Guadeloupe lo determiná e ganadó di Grupo C di buèlta klasifikatorio di CONCACAF U-20. Esei a bira realidat despues dje resultadonan di ayera nochi, ku viktoria di 2-1 di Kòrsou riba Belize miéntras ku Guadeloupe a derotá Saint Martin 4-1.

Dilanti di un bon asistensia públiko, e selekshon lokal ayera nochi a bringa ku alma i kurpa den un wega di hopi bon nivel. Belize no ker a duna su mes komo entregá i a duna un tremendo wega, kaminda prinsipalmente nan kiper Devid Nunez a resultá e “angel salbadó” dje partido.

Serka Kòrsou Tyrick Bodak tampoko a keda’tras. E tabatin dos salida importante pa evitá gol, miéntras ku Luchenthly Vrutaal (Centro Barber) a sòru pa e dos golnan pa Kòrsou a sali viktorioso.

For di e minütnan inisial por a tuma nota ku e wega lo no a bira algu fásil pa Kòrsou. Belize ounke ku un wega poko brua, tabata mas bien stroba kos miéntras ku Kòrsou tabata buska manera pa arma atake.

Despues di purba vários biaha, finalmente e gol pa habri e skor ta kai ora ku Vrutaal kibra drenta riba ala robes i ku un bon tiru ta bòl e nèt: 1-0.

Den di dos tempu Belize ta empatá mediante tiru penal ora ku entre un defensa i kiper Bodak nan tumba un hungadó den área penal. Jesse August ta kobra ku éksito: 1-1.

Despues di esei e wega a krese na emoshon ku ámbos ekipo buskando gol pa bai ariba. Kòrsou su linia ofensivo a los vários disparo ku a keda kontrolá pa e kiper bishitante. Finalmente, for di un tiru di skina faltando algun minüt pa wega kaba, Vrutaal ta skor su di dos gol pa duna Kòrsou e triunfo.

Guadeloupe 4-1 riba Saint Martin

E dos ekiponan di fransesnan karibense a enfrentá otro, ku Guadeloupe logrando viktoria fásil di 4-1. Ku e resultado aki kombiná ku e skor di Kòrsou v/s Belize, Guadeloupe ta den posishon bentahoso i tin mester di minimal un empate pa gana e grupo.

E promé gol di Kòrsou, ku kiper Nunez mirando e bala den nèt.

Hugada ku tinta di gol, pero Kiper Tyrick Bodak na ora ta saka man pa evitá gol di e bishitantenan.

E hugada di penalty mediante kua Belize a empatá e wega.

Direktor tékniko Raul Gonzalez huntu ku e goliadó Luchenthly Vrutaal.

Kiper Devin Nunez den akshon. Sigur el a skapa su ekipo di a sufri un di dos goliada.