WILLEMSTAD.- E último biaha ku Kòrsou a topa ku Jamaica, tabata riba 25 di yüni 2019 durante Gold Cup 2019. Selekshon di Kòrsou a logra empatá e partido ku un tremendo gol den pitu di Juriën Gaari. E resultado tabata unu históriko pa yuda Kòrsou, mirando ku esaki a yuda nan klasifiká pa kuart final di Gold Cup pa promé biaha den historia.

Promé ku esei Kòrsou a topa ku Jamaica na dos okashon den 2017. E promé biaha den final di Kopa Karibe, kaminda Kòrsou, riba 25 di yüni ku dos gol di Sontje Hooi, a gana di Jamaica ku skor di 2-1. Esaki pa asina bira kampion di e último edishon di Kopa Karibe.

Miéntras un par di siman despues, Jamaica riba 9 di yüli, a gana Kòrsou ku skor di 2-0. Esaki tabata Kòrsou su promé partido den historia di Gold Cup.

Ku otro palabra den e tres enkuentro ku nan a disputa, ámbos selekshon a gana un biaha i empatá e otro wega.

Tin kuater hungadó ku a enfrentá Jamaica na 2019 i ku ainda ta forma parti di selekshon di Kòrsou. Ta trata akí di Juriën Gaari, Eloy Room, Kenji Gorré i Leandro Bacuna. Room, Gaari i Bacuna tur tabata titular, miéntras ku Gorré a drenta di kambio.