Kampionato Suramerikano di sòftbòl

WILLEMSTAD.- Un tripel ku basenan yen di Shanysse Emerenciana den extra inning ayera nochi a duna Kòrsou un triunfo di 4-3 riba Colombia i na mes momento e pase pa e wega final di Kampionato Suramerikano di sòftbòl femenino. Kòrsou awe nochi den e gran final lo topa ku ganadó di partido di awe tardi entre Brazil i Colombia.

Un triunfo, un lokura

Dug-out di Kòrsou ayera nochi na Guayaquil, Ecuador, a rementá di alegria na momento ku Shanysse a saka un bataso grandi pa rightcenter ku basenan yen. E velosistanan di Kòrsou a bula pasa riba e basenan i a laga e ekipo kolombiano den tereno den un partido kaminda ku picheo a dominá.

E partido tabata un duelo di picheo entre Nella Elizabeth i e kolombiana Hurtado. E picher di Kòrsou a basha no ménos ku 11 ponche kontra 7 di Hurtado.

Tabata Colombia ku den kabes di terser inning ta habri e skor ku un kareda kontra di Elizabeth. Hurtado si no tabata duna nada i tabata te den di sinku inning ku Michenou Marselia ta liga e promé hit (infieldhit) kontra dje kolombiana. Pero tabata den di seis ku Kòrsou ta bin empatá e partido. Anaise Piar ta pone un toke i ta yega primera. Xiaryse Emerenciana ta sakrifiká i ku dos out ta surgi un passedball pa Piar skor kareda di empate.

...Nella Elizabeth ku 11 ponche ayera, pa hiba Kòrsou na e triunfo...

Den kabes di shete Colombia ta monta un atake, pero Emerenciana ku un tremendo bulada ta kue un linia pa sera e entrada.

Colombia ta bai ariba den di ocho (extra inning) riba rolling ku koredó na tersera i fly di sakrifisio: 3-1.

Pero den bòm di ocho ta surgi e desenlase: Ku koredó na 2da, Pipi Hariquez ta pone un toke, Tiru ta bai 3ra, e koredó ta safe, pero Hariquez tambe ta sigui te 2da. Ta sigui un ponche i un ‘hit by pitch’ pa yena base. Tabata na e momento ei ku Shanysse ta bati su tripel pa hinka Kòrsou den e final di awe nochi 18:30 or.

Semi final Col – Bra

Pa 4 or di atardi e team kolombiano lo tin su di dos oportunidat pa yega final. Nan lo topa ku Brazil den e wega semi final, ku Kòrsou den tribuna ta mira e wega. Dirèkt despues dje partido ei, e ganadó lo topa Kòrsou den e wega pa e título di kampion.

...Selekshon di Kòrsou riba tereno promé ku e partido...

...Kimberley Agard, kècher di selekshon...