WILLEMSTAD.-  Un team di scout i trainer di MLB, asistí pa coachnan di Curaçao Baseball Development Foundation, siman pasá na Tio Daou Ballpark a tene 3 dia eksitoso ku tryout’s. Kasi 70 hóben pelotero di entre 13 pa 18 aña di edat a partisipá na e tryoutnan. E aktividat aki tabata en konekshon ku e programa di Elite Development Program ku MLB próksimamente lo kuminsá kuné aki na Kòrsou. Den pasado kaba e programa aki tabata establesé na Kòrsou i vários hungadó di e programa a yega di firma profeshonal òf a haña chèns pa bai studia na Merka.

Kòrsou tin hopi talento i esaki a keda demostrá un bes mas durante e tryoutnan intensivo ku a tuma lugá siman pasá. E hungadónan a keda evaluá basá riba vários ehersisio pa asina kolektá data ku ekipo sofistiká di kada hungadó. Basá riba e data aki e team di scout di MLB lo evaluá i skohe e siguiente grupo di hungadó ku lo djòin e programa di Elite Development.

A tèst e hungadónan entre otro riba nan spit kaminda a pone nan kore 60 meter. Na 10 i 30 meter di nan sprint tambe a midi nan velosidat. Aki a usa ‘electronic timing gates’ pa midi e velosidat di e hungadó. Tambe a midi ‘arm exit velocity’ di e hungadónan defensivo (outfield, infield i catcher). Durante e práktika di bateo kada hungadó a haña dos ronda di 6-8 swing. Aki a usa e teknologia di ‘trackman’. Mesun teknologia e keda usá pa kolektá sifra di e pichernan. E pichernan a tira un ’10 pitch bullpen session’ for di montíkulo.

Demostrando e importansia pa restablesé Elite Development Program na Kòrsou. MLB a manda un delegashon di 6 persona pa guia e tryoutnan. For di MLB New York a bin Chris Madden ku ta Sr. Coordinator International Baseball Development. Esaki tabata e promé bishita di señor Madden i e la keda impreshoná ku e talento lokal.

For di Republica Dominicana a bin un delegashon di 4 scout, enkabesá pa Henry Gonzalez ku ta Director International Baseball Operations di MLB. Gonzalez no ta un deskonosí ku Kòrsou ya ku den pasado kaba e la kordiná e Elite Developent Program riba nos isla.

Pa mustra e importansia di un kurpa saludabel MLB a bin ku Chad Gravenorst, un asina yamá ‘strength and conditioning’ coach, direktamente for di Suráfrika pa e hungadónan hasi ehersisio promé ku nan a kuminsá ku e trainingnan mes di baseball. E parti di ‘strength and conditioning’ ta masha importante pa MLB i e programa komo ku e ta kontribuí na mantené na un kurpa salú di e hungadó. E coachnan lokal, Ben Thijssen i Payo Faneyte, ku vasto eksperensia ku tantu baseball lokal komo internashonal a komplementá e team di coach pa e tryoutnan.

Pa MLB ta importante pa e wega di baseball keda krese rònt mundu i ta konsiderá Kòrsou komo un merkado importante den nan strategia. Kòrsou ta keda e pais ku per capita ta produsí mas hungadó di baseball den MLB ku kualke otro pais. MLB ta hopi entusiasmá pa bolbe kuminsá ku programa di Elite Development. E intenshon ta ku e programa aki lo bira un kompromiso di término largu di MLB ku baseball di Kòrsou. Den e próksimo dianan MLB lo evaluá tur e data kolektá i asina selektá e grupo di 34 hungadó ku lo forma parti di Elite Development. MLB via di su partner lokal Curaçao Baseball Development Foundation lo tuma kontakto ku e hungadónan selektá i informá nan di e siguiente pasonan pa ku komienso di e programa.