BUENOS AIRES.- Entre 1e pa 8 desèmber último, a tuma lugá e Campeonato Sudamericano Sub-17 i Copa Iberoamericana na Buenos Aires, Argentina. Kòrsou a keda representá pa e atleta Teshawn Eleonora, ku a biaha huntu ku su coach Emil Sangronis Garcia i e presidente  sra. Ilse Lau-A-Kien  di CWF komo delegado. E kompetensia por a konta ku partisipashon di mas ku 15 pais e.o. Aruba, Guatemala, USA, Chile, Perú, Brasil, Colombia, Paraguay,Uruguay. Kòrsou tabatin representashon di 1 atleta, Teshawn Eleonora kende a partisipá den e kategoria di peso 102 Kg. Tabata promé biaha ku e ta partisipá na un kompetensia internashonal na e nivel aki. E atleta mester a enfrentá retonan hopi grandi promé di por a subi tarima pa kompetí, pero a demostrá un madures enorme, siguiendo instrukshonnan, keda enfoká riba e loke el a bai pa hasi i a logra kompetí entre 6 atleta mas i pa na final logra e medaya di bròns.

No tabata fásil pa logra e biahe pa motibunan finansiero, pero danki na kolaborashon di algun instansia i algun persona na último ora, a logra hasi e biahe aki. Di e manera aki, Curaçao Weightlifting Federation a logra sera su programa kompetitivo pa 2019 i despues di evaluashon e siman aki mes, lo bai kuminsá traha hopi duru riba aktividatnan pa 2020. Un kos ta sigur, e federashon no ta kansa di bisa, ku un biaha mas a keda demostrá e derecho di eksistensia di e deporte olímpiko aki. CWF ta boga pa sosten di komunidat kompleto, primeramente pa partisipashon mas tantu di hóbennan den e deporte aki, sosten finansiero pa por kompletá loke ta nesesario pa sigui desaroyo e deporte aki. Un danki ta bai na gobièrnu, ku via di su diferente ministernan e organisashon a haña full sosten, na komersio partikular, na mayornan, na famia i konosínan, na públiko en general ku a sa di partisipá na nos aktividatnan, na Crossfit Willemstad, 5Triple9, Crossfit Zeelandia, Bob Esprit Gym, Ilift Gym ku a sòru pa nan miembronan partisipá aktivamente na kompetenshanan. E federashon ta gradisí di kurason  e medionan di komunikashon ku a sa durante di henter aña pa duna nos e kobertura nesesario. Riba kombinashon di fotonan por mira Teshawn Eleonora riba podio i tambe ta pos ku su medaya.