WILLEMSTAD.- Selekshon di beisbòl di Kòrsou den luna di desèmber lo bai defendé su título di kampion di Kopa Karibe, título ku Kòrsou a logra na 2021 hungando aki na kas. Na e okashon aki e kampionato lo tuma lugá na Bahamas, entre 4 pa 11 di desèmber. Durante e Kopa Karibe aki lo bai tin dos kupo disponibel pa klasifiká pa “Juegos Centroamericanos y del Caribe” di próksimo aña. Esaki lo tuma lugá na El Salvador.

Te na e momento aki 6 pais a konfirmá nan presensia den e di kuater edishon di Kopa Karibe. Esakinan ta: Puerto Rico, US Virgin Islands, Haiti, Kòrsou, Cuba i Bahamas. Manera ta konosí, den e final aki na Kòrsou e ekipo di kas a derotá Cuba den e gran final.

E konosido George De Lira, presidente de COCABE, a splika ku Cuba lo forma parti di e torneo komo pais invitá. Ainda ta wardando riba desishon di dos pais, pa konfirmashon ku nan lo ta presente na Bahamas. Esaki nan ta isla ruman Aruba i tambe Perú. Perú a partisipá kaba na e promé edishon di e torneo.

E sorpresa grandi pa e organisadónan di e torneo tabata na momentu ku Colombia a duna di konosé ku nan lo no ta presente, siendo ku ta un oportunidat pa buska klasifikashon pa e Weganan CAC di El Salvador.

Pa loke ta trata preparashon di selekshon di Kòrsou, ta plania pa den e próksimo dianan kuminsá na publiká e preselekshon. Despues opviamente lo siguí pa yega na e selekshon definitivo ku lo tin ku defendé  e título di kampion.