WILLEMSTAD.- Un inning e ekipo di Rep. Dominicana tabatin mester pa a realisá un rally di kuater kareda i a gana di Kòrsou ku skor di 4-1 ayera nochi na Barranquilla. E ekipo di Kòrsou ku klaramente tabata e faborito di públiko a haña su oportunidatnan, inkluso ku base yen, pero ta keda kòrtiku den su wega di debut den e Weganan na Barranquilla.

Manager Taffy de Jongh a habri ku su picher prinsipal Richelle van Gennip. E habridó despues di poko problema den promé inning ku nan a yena base den su kontra, ta rekuperá su kontrol i ta   lansa e siguiente tres entradanan sin problema.

Pero den di kuater e ta duna base por bola i ta sigui hit empuhadó di kareda. Shanna Tevrede ta drenta di relevo i despues di saka un out, e ta duna un base intenshonal ku ta yena basenan. Ta sigui otro base por bola ku ta pone e skor na 2-0 i finalmente un hit ku ta manda dos kareda mas kas.

Kòrsou ta haña algun oportunidat, pero e hit oportuno no ker a presentá. Ku dos koredó na base den di kuater Kòrsou ta faya pa manda kareda kas. Den di seis ta yena basenan sin out, pero despues di hugada di fielderschoice ku out na home, ta sigui pone pa e emergente Emmely Jonis i Lili Craanberg.

Den bòm di shete Kòrsou ta bolbe menasá ora ku Deidra da Costa Gomez habri ku hit, ta sigui ‘hit by pitch’ pa despues Jonis bati Rolling pa tersera. Ta surgi eror den tiru i Kòrsou ta kibra e blankeo.

Pero e picher relevista ta hasi su trabou i ta poncha e siguiente tres bateadónan pa pone punto final na e partido. Rep. Dominicana tabatin 4 kareda, 5 hit i 2 eror. Kòrsou 1-5-0.

Awe Kòrsou tin su siguiente kompromiso ku ta kontra di Mexico, ku ayera a gana 5-0 di Venezuela.

Por sierto ku Mexico, Venezuela i Pto. Rico despues dje Weganan CAC lo subi avion rumbo pa Hapon, pa tuma parti na Kampionato Mundial