WILLEMSTAD.- Den e dianan aki promé ku elekshon di dia 28 di aprel, nos a hasi nos análisis riba tópikonan ku ta bin dilanti, i naturalmente nos ku tambe ta forma parti di e kontentá elektoral tambe ta laga nos pensamentunan pasa riba e situashon general di nos dushi pais Kòrsou, pero muy en espesial riba e áreanan ku nos ta envolví aden, esta hustisia i kultura. Durante reunionnan di direktiva, nos a diskutí i analisá nos farándula den su profundidat.
Nos mester konstatá i yega na e konklushon, ku ta masha poko polítiko ku ta partisipá na elekshon, ta duna atenshon na nos kultura.
Hopi ta menshoná tur klase di sosten na deporte, lokual nos ta aploudí kompletamente, pero ta neglishá pa hopi aña kultura, manera un yu sin mama.
Pa nos ilustrá ku algun ehèmpel, ta menshoná e nesesidat pa reservá fondonan pa promé deporte, pa traha kanchanan di deporte, pero ta lubidá di menshoná e nesesidat pa krea fasilidatnan pa práktika nos kultura.
Kon ta pará ku restrukturashon o konstrukshon di nos teatro nashonal,
Promoshon di proyektonan di formashon musikal i di arte, ki dia nos ta bolbe lanta un akademia di arte, ki dia nos ta sostené, otro komplehonan kultural, manera un Festival Center, Luna Blou i :La Tentashon?”
Na Aruba i St.Maarten por ehèmpel, ta gobièrnu a finansiá konstrukshon di Entertainment Center, kaminda artistanan lokal ta kompartí tarima ku artistanan internashonal.
Nos pensamentunan ta bai tambe na nos bida nokturno, na insentivonan pa sostené promotornan di aktividatnan kultural. Si no tin promotor no tin trabou pa nos artistanan.
Nos farándula ta un industria ku ta krea hopi kupo di trabou, i komo tal mester krea fasilidatnan, pa promové e sektor aki tambe.
E situashon den farándula, na e momentu aki ta pésimo, práktikamente no tin aktividat i esnan ku tei, nos ta trata di matanan.
Aktividatnan grandi manera North Sea Jazz , Festival di Tumba, Karnaval i Seú ta den zona di peliger.
Nos tin algun pregunta, ku mester haña un solushon riba korto plaso;
Ki dia nos ta bai introdusí un rekargo di 2 sèn, pa krea un fondo, manehá pa un instansia imparsial pa kontribuí na proyektonan kultural.
Ki dia nos ta ban krea fasilidatnan fiskal, pa aliviá e peso ku ta riba lomba di esnan ku ta dependé di nos farándula pa sobrebibí?
Ki dia nos ta eliminá OB, kita impuesto riba instrumènt, trahenan i otro materialnan di Karnaval.
Ki dia nos ta introdusí, manera ta e kaso na p.e. Aruba, un sistema kaminda promotornan serio, for di prinsipio di aña , por bin na remarke pa haña un kantidat di pèrmit, pe e por planeá su aktividatnan trankil ?
Ki dia gobièrnu ta duna mas atenshon pa baha e ola di krímen, ku ta duna e siudadano miedu di sali su kas?
Ki dia lo konkretisá proyektonan di lei, pa eliminá OB riba tur aktividat kultural, eliminá impuesto riba tur artíkulo di arte, i krea fondonan pa stimulá nos kultura?
Ki dia nos ta realisá, ku arte ta un piesa importante pa stimulá nos turismo ekonomia, i yuda krea un komunidat sano?
Ki dia gobièrnu ta introdusí un lei, den kua ta stipulá, ku radioemisoranan i kanalnan di televishon lokal, mester inkluí, promoshon di arte den parti di nan programashon?
Kon ta posibel, ku no por duna fasilidatnan kultural e mesun trato ku fasilidatnan deportivo, por ehèmpel, e preis simbóliko di derecho di erfpacht?
Hopi biaha nos pensamentunan di e artista ta robes. Nos ta denominá artistanan komo aktornan puru komersial, lokual no ta kompletamente korekto.
Meskos ku e pelotero hóben den liganan menor ta hasi esfuerso pa despues por haña oportunidat pa bira un profeshonal, ku por tin karera profeshonal briante, i bin na remarke pa gana miónes, esaki ta e mesun kaso ku e artista. Unikamente e artista no ta hañá e mesun oportunidatnan.
Nos ta kere ku a bira tempu, pa ban saka Kòrsou for di e krísis kultural.
Palabra ta na tur artista di teatro, obra di man, pintornan, músikonan i tur demas aktornan den ramo di nos kultura pa bai vota i duna bo sosten na e kandidato ku segun bo análisis ta dispuesto pa realisá e kambionan aki.
Laga un komentario