WILLEMSTAD.- Korsou a posishoná su mes na un puesto faborabel den Grupo C di CONCACAF den eliminatorio pa Mundial 2022, anotando un viktoria importante di 2-1 riba Cuba. E selekshon nashonal di Korsou ayera den un bon enkuentro den Estadio Mateo Flores na Ciudad de Guatemala a registrá su di dos viktoria dje torneo. Tabata un partido fuertemente bringá di parti di ámbos ekipo, ku tur tres gol anotá den e promé tempu.

E ekipo dirigí pa Guus Hiddink a subi tereno ku tres kambio kompará ku e aliniashon di djabièrnè último, ku Michael Maria, Roly Bonevacia i Charlison Benschop remplasando De Nooijer, Nepomuceno i Van den Hurk.

Momento ku Leandro Bacuna ta habri e skor pa Korsou na di 11 minüt di wega (fotonan: Diarios Modernos, Guatemala).

Den e promé minütnan Korsou mester a tene kuenta ku un ekipo cubano ku tabata move rápidamente riba tereno, ku prinsipalmente Onel Hernandez kende ta hungadó di  Norwich City (Inglatera) ku a duna e defensa di Korsou bastante trabou. Den e prome dies minütnan e cubanonan tabata dikta kiko tabata sosodé riba tereno, ora ku direpente a surgi un kontra atake di Korsou i Leandro Bacuna ku un bon tiru ta habri e skor.

Poko poko pero sigur e medio kampo di Korsou a kuminsá hasi su trabou tantu ku ayudo defensivo komo tambe pa traha riba e atakenan. Pero na di 27 minüt un fayo den medio kampo kaminda a entregá e bala na Cuba, a resultá den gol di empate na momento ku Hernandez ku un tiru fulminante i krusá ta vense Eloy Room.

Ku e wega empatá, ámbos team a kuminsá move riba ‘speed’. Tabata Korsou ku den minüt final dje prome tempu ta pone e skor na 2-1. Jarchinio Antonia ta interseptá e kueru na altura di medio kampo, e ta avansá ku speed i den área penal ta pone e kueru dilanti di arko kaminda ku Charlison Benschop ta vense e kiper Sandy Sanchez: 2-1.

Den e di dos tempu e cubanonan a baha ku tur forsa, gastando energia ku hugadanan riba velosidat. Korsou mas bien tabata sinta warda e avanse cubano. Un táktika ku a duna resultado den e último minütnan dje wega ora ku e cubanonan a gasta tur energia, dunando Korsou oportunidat pa arma su wega bek. Den delaster minütnan ta surgi por lo ménos un bon chèns di gol pa Korsou, pero e kiper cubano ta logra para un tiru lastrá.

Aliniashon Korsou: Eloy Room, Cuco Martina, Jurien Gaari, Suently Alberto, Michael Maria, Juninho Bacuna, Vurnon Anita, Leandro Bacuna, Roly Bonevacia (62 min: Anthony van den Hurk), Jarchinio Antonia (62 min: Sontje Hooi), Charlison Benschop (62 min: Antony van den Hurk).

Charlison Benschop den minüt final dje promé tempu ta manda Korsou ariba 2-1.

E situashon:

Korsou a gana su di dos wega miéntras ku Guatemala tambe a hasi esei ku viktoria di 3-0 riba British Virgin Islands. Korsou i Guatemala tin 6 punto, faltando dos wega kada un. Dia 4 di yüni Guatemala ta topa St. Vincent i su siguiente dia, 5 di yüni, ta Korsou kontra di British Virgin Islands. Por sierto B.V.I. dia 27 último a hunga su prome wega aki na Korsou i mayan tambe nan lo ta na Brievengat pa nan di dos kompromiso. E kalendario di FIFA no ta menshoná ainda unda e wega Korsou v/s BVI lo hunga. Lokual si ta sigur, ku e partido entre Korsou i Guatemala lo ta den Stadion Ergilio Hato dia 8 di yüni.

Resultadonan CONCACAF:

Grupo A:

USVI 0, Antigua & Barbuda 3

Montserrat 1, El Salvador 1

Grupo B:

Aruba 0, Surnam 6

Grupo C:

BVI 0, Guatemala 3

Cuba 1, Korsou 2

Grupo D

Dominica 1, Panamá 2

Grupo E

Turks & caicos 0, Nicaragua 7

Grupo F

Bahamas 0, St. Kitts & Nevis 4

Pto. Rico 1, Trinidad & Tobago 1

Vurnon Anita ta bringa e kueru ku Onel Hernandez, kende na di 27 minüt a empatá e skor.