WILLEMSTAD.- Ayera nochi den stadion Ergilio Hato dilanti di un gran públiko tabatin e interesante partido di futbòl bálido pa Concacaf Nations Leaque entre e selekshon di Costa Rica i esun di Kòrsou. Lamentablemente nos mester informá ku selekshon nashonal di Kòrsou a keda chikí kontra di e selekshon mundialista di Costa Rica. Kòrsou a pèrdè ku skor pèrtá di 2-1 pero ku kara na laira.

Den komienso di e partido por a mira un selekshon di Costa Rica kabei na djente i ku gana di bai kas ku e triunfo.  Nan tabata ataká e ekipo di Kòrsou ferosmente for di medio kampo bai dilanti i ku algun hungadó di hopi forsa físiko i tambe ku hopi maya. Esaki tambe a pèrkurá pa nan por a yega na nan promé gol via di un pinalti na momentu ku kiper Eloy Room hunga un bala demasiado kòrtiku pa Shermar Martina. Esaki ta debolbé e bala pa Eloy Room i un hungadó di Costa Rica ta pasa dilanti Room kende a saka pia i asina ta  tumba e hungadó aki. Johan Venegas di Deportivo Saprissa di Costa Rica ta kobra e pena máksimo aki impekabel.

Despues djei Kòrsou a manera lanta fo’i soño i a kuminsá hunga bala manera hòmber atakando Costa Rica fuertemente.  Juninho Bacuna ku  ayera nochi a hunga ku alma i kurpa pa nos selekshon ta kue un bala riba medio kampo i hunga un outopas i pasa den e defensa di Costa Rica i bai lora e bala masha bunita riba kabes di Reangelo Janga kende tambe ta kòp e bala masha bunita mes den gol di Costa Rica p’asina empatá e wega 1-1 na di 20 minüt di wega.

Den e di dos mitar ta bin algun wega brutu di parti di Costa Rica i esaki a kondusí ku e hungadó Ricardo Blanco ta risibí su di 2 karchi hel i ta keda ekspulsá. Akinan Kòrsou a krese i a kue e wega kompletamente for di Costa Rica. Sinembargo en bes di probechá e desbentaha aki di Costa Rica i anotá mas gol nos tabata faya e oportunidatnan pèrdiendo bala meimei di tereno. Di otro un banda Costa Rica si ta haña dos chèns i ta probechá na di 85 minüt pa via di un tiru di skina pa hasi e wega 2-1. Tabata Francisco Calvo, defensa di Costa Rica, ku ta bula kòp su so sin ningun markashon pa e bala pasa bai pega den nèt sin Eloy Room por a bula riba dje.

Despues di esei Kòrsou direpente a tuma e wega over i ta preshoná. Pero tur bala tabata bai pega riba e defensa kostarisense ku tabata rechasá e kueru. Di e manera ei Kòrsou ta bin pèrdè e enkuentro ku tabata un oportunidat grandi pa logra klasifikashon pa e buèlta final di Nations League.

...Selekshon nashonal di Costa Rica ku a pone su mes den posishon kómodo pa gana e grupo...

...Kòrsou su diesun hungadónan ku a start ayera nochi. Durante gran parti dje wega nos a keda dominá pa e bishitantenan...

...Kiper kostarisense ta bula, pero no por a para e bala di kòp pa Reangelo Janga pa pone e skor na 1-1...

...Atake di Kòrsou riba e arko kostarisense...