WILLEMSTAD.- Un biaha mas atletanan di Kòrsou ta bria riba tarima mundial i awor den e ramo deportivo di Kickboxing. Djabièrnè tabatin un kartelera di e deporte aki na Abu Dhabi den kual dos yu di Kòrsou i un otro atleta ku su tata ta nasé aki na Kòrsou a bringa.

E pelea prinsipal a bai entre Endy Semeleer i Jay Overmeer pa título mundial den ‘welterweight’. Semeleer a nase na Kòrsou i Overmeer su tata a nase na Kòrsou. Den e pelea mas tempran Brandon Fos tambe di Kòrsou a bringa den e kategoria ‘lightweight’.

Den un pelea di 5 rònt, tabata Semeleer ku a logra gana e título a base di un desishon unánime. Esaki ta e di 31 viktoria di su karera. Den e otro pelea Brandon Fos a sali viktorioso. Henter e kartelera aki a kai bou di Enfusion ku ta kompania di promoshon ulandes di kickboxing i Mixed Martial Arts.

Enfusion ta promové peleanan rònt mundu i esaki a tuma lugá na Abu Dhabi i un biaha mas nos atletanan ta sobresalí te otro banda di mundu.

Atletanan yu di Kòrsou di kickboxing a bringa na Abu Dhabi.