WILLEMSTAD.- Den añanan 80 e ritmo di Kadans i Zouk tabata realmente grandi den farándula. Kòrsou a konosé diferente banda di Kadans i Zouk ku tabata sumamente popular. Bandanan manera Mais, Turbo, Rizam tabata yena fiestanan di Kadans i Zouk ku míles di fanátiko. Radionan tabata toka kadans i zouk konstantemente. E ritmonan tabata dje popular ei, ku e tabatin hasta su propio estilo di baile. Asina Kòrsou a konosé tambe vários kòntèst di baile di Kadans i Zouk den añanan 80.
Dia 18 di mei awor, Stichting Save Our Youth Curaçao ta presentá inisio dje proyekto: Curaçao Kadans & Zouk Revival. E idea ta pa medio di un proyekto riba término largu, rebibá e ambiente dushi di Kadans i Zouk na Kòrsou den aña 80. E promé aktividat ta djasabra 18 di mei den W.T.C. ora ku e bandanan Mais, Turbo, Rizam i E.R.A. lo topa otro den e ambiente di Kadans i Zouk, kombiná ku e DJ rei di kadans den aña 80, Sidney ‘El Yankee’ Amerikaan i tambe DJ Black.
Riba e anochi aki, Sony Real, Tico Libiee, Urvin ‘Luwi’ Jano i Paul Welvaart lo ta bèk riba tarima ku nan banda pa basha Kadans i Zouk. Durante e anochi lo tin vários premio di porta i tambe premio pa e bailadónan di Kadans i Zouk ku ainda por mustra kiko nan tin aden.
Karchinan ya ta na benta na Mensing Caminada i Pòmp di Gasolin Sta. Maria. Djasabra 27 di aprel lo tin un ‘gimmick’ den Punda kaminda lo por kumpra un kantidat limitá di karchi na un preis spesial i topa e ídolonan di Kadans dje tempu ei. Pues tur kos ta kla pa e anochi históriko di Curaçao Kadans & Zouk Revival 2019 di 18 mei awor den W.T.C. ku Mais, Turbo, Rizam i E.R.A. den un tremendo enkuentro musikal baliabel.