WILLEMSTAD.- Djadumingu 21 di yüni e damitanan dje kategorianan U12 te ku U16 di Women’s Basketball Association of Curaçao (WBAC) a lucha pa e trofeonan di kampeon hubenil di basketbòl 5-kontra-5 dje torneo di klousura patrosiná pa Forza. Den kategoria Varsity/U16 e kopa a bai pa Challengers. Den Junior Varsity/U14 e hobensitanan di Spartans a sali kampeon, pero den Juniors/U12 atrobe e tim Challengers a bisti e korona.
Den Super League/U18, e kategoria prinsipal di WBAC, despues di gana Platinum djabièrnè pasá, e ekipo Diamond lo topa e kinteto Gold riba djasabra 27 di yüni pa disidí kua t’e mihó di 2026.
Den Varsity/U16, ku 13 punto di Nizjeeny Offerman, Spartans a lucha balentemente den u último kuart dje wega pa sera un buraku di 10 punto. Pero al final Challengers a sobrebibí ganando Spartans 33-30. Pa Challengers Leyla Copini Inees a marka 14 punto.
E hobensitanan di Junior Varsity/U14 tambe a ofresé e públiko un final emoshonante. Den U14 Spartans tin algun aña kampeon pero Challengers a bin desidido pa kibra e kadena. Ta te den komienso di e último kuart Spartans a kue un bentaha mas reimu, nèt sufisiente pa bira kampeon ganando 16-14. Esei danki na kuater punto di Amara Uzoma na momentu krusial.
Kategoria Juniors/U12 tambe a mustra ku Kòrsou su basketbòl di mucha muhé tin futuro. Entre esnan di mas hóben Challengers a saka inspirashon pa gana Pink Panthers ku 20-10.
Den e kategoria Super League/U18 su semi-final, Diamond a sali di porta grandi ganando Platinum 37-34 ku 12 punto di Cati Lichtenberg i 8 punto, inkluyendo dos 3-pointer, di e talentoso Zynha Curial. Pa Platinum Xzagelys Pietersz a nota 12 punto den kousa pèrdí.
E gran final di WBAC su Forza Challengers Cup lo ta riba djasabra 27 di yüni pa 7.30 anochi den Sala Niels Liberia na Sufisant. E orei e ekipo Diamond liderá pa e strea Cati Lichtenberg lo midi forsa ku e kinteto Gold bou di guia di coach Dangi D’Angelo Felida.
